უშიშროების საბჭოს მდივანი ირინა იმერლიშვილი აშშ-ის სახელმწიფო დეპარტამენტის განცხადებას ეხმიანება და გამოვთქვამ, რომ პროკურატურა დადებს უტყუარ მტკიცებულებებს, ყოფილ პრეზიდენტთან დაკავშირებით.
,,ძალიან დიდ იმედს გამოვთქვამ, რომ საქართველოს პროკურატურა დადებს უტყუარ მტკიცებულებებს, იმ დანაშაულთან დაკავშირებით, რომელიც წაუყენა ყოფილ პრეზიდენტს. შესაბამისად საქართველოს სასამართლო მიუკერძოებლად, დამოუკიდებლად მიიღებს გადაწყვეტილებას სწორედ ამ მტკიცებულებების ერთობლიობის საფუძველზე. შესაბამისად ქვეყნის შიგნით სკეპტიკოსებსაც და გარეთ ჩვენს მოკავშირეებთან გაეფანტებათ ყველა ეჭვი ", - განაცხადა ირინა იმერლიშვილმა.
აშშ-ის სახელმწიფო დეპარტამენტი საქართველოს ყოფილი პრეზიდენტ მიხეილ სააკაშვილისთვის ბრალის წარდგენას ეხმაურება და შეშფოთებას გამოთქვამს მისი სისხლის სამართლებრივ პასუხისგებაში მიცემის გამო.
,,აშშ-ის სახელმწიფო დეპარტამენტი შეშფოთებულია საქართველოს ყოფილი პრეზიდენტის, მიხეილ სააკაშვილის სისხლის სამართლებრივ პასუხისგებაში მიცემის გამო. კანონის უზენაესობის ერთგულება ნიშნავს არა მხოლოდ იმას, რომ დემოკრატიულ საზოგადოებაში ყველამ უნდა დაიცვას კანონი, არამედ იმასაც, რომ სამართლებრივი სისტემა არ უნდა იქნას გამოყენებული პოლიტიკური შურისძიების იარაღად. ჩვენ ამ და სხვა დაკავშირებულ საქმეებს ყურადღებით ვაკვირდებით და ხაზგასმით აღვნიშნავთ სამართლიანი სასამართლოსა და კანონის უზენაესობის პრინციპების განუხრელი დაცვის მნიშვნელობას", - ნათქვამია განცხადებაში.
