"თბილისის სასწავლო უნივერსიტეტის" რექტორი, პროფესორი სოლომონ პავლიაშვილი რიგაში იმყოფებოდა, სადაც რიგის ეკონომიკისა და ბიზნესადმინისტრაციის საერთაშორისო სკოლის (Riga International School of Economics and Business Administration) ვიცე-რექტორს, პროფესორ ტატიანა ვასილევას შეხვდა.
მხარეები ურთიერთანამშრომლობის მემორანდუმის გაფორმებაზე შეთანხმდნენ, რომელიც საბაკალავრო და სამაგისტრო პროგრამებზე სტუდენტების გაცვლას, აკადემიური პერსონალის ერთობლივ ტრეინინგებს, საერთაშორისო კონფერენციებსა და, რაც მთავარია, საერთაშორისო საგრანტო პროგრამებში ერთობლივ მონაწილეობას ითვალისწინებს.
"ლატვიის უნივერსიტეტებს შორის, რიგის ეკონომიკისა და ბიზნესადმინისტრაციის საერთაშორისო სკოლა ძალიან მაღალი რეიტინგით გამოირჩევა. სკოლაში 3000-მდე სტუდენტი სწავლობს. სწავლება კი, ლატვიურ, ინგლისურ და რუსულ ენებზე მიმდინარეობს. უნივერსიტეტს აქვს სადოქტორო და ასევე, ისეთი პროგრამები, რომელთა განხორციელებაც ძალიან მნიშვნელოვანია ჩვენი უნივერსიტეტისთვის", _ განაცხადა სოლომონ პავლიაშვილმა.
მისივე თქმით, უნივერსიტეტების დამეგობრებაში ჩართულია საქართველოს საელჩო ლატვიაში.
ცნობისთვის: "თბილისის სასწავლო უნივერსიტეტს" საერთაშორისო მემორანდუმები გაფორმებული აქვს პოლონეთისა და გერმანიის უნივერსიტეტებთან.