"მე, როგორც მთავრობის მეთაურს, კარგად მაქვს გაცნობიერებული ის უდიდესი მოვალეობა და პასუხისმგებლობა, რომელიც ახლა ჩემს გუნდს, ჩვენს მთავრობას ქვეყნის წინაშე ეკისრება", - აღნიშნა საქართველოს პრემიერ-მინისტრმა ირაკლი ღარიბაშვილმა, პარლამენტში სიტყვით გამოსვლისას.
როგორც ღარიბაშვილმა განმარტა, საპარლამენტო და საპრეზიდენტო არჩევნებში, და წელს უკვე ადგილობრივი თვითმმართველობის არჩევნებში საქართველოს მოსახლეობის უდიდესმა უმრავლესობამ მხარი დაუჭირა კოალიცია ,,ქართულ ოცნებას" და ეს არის უდიდესი ნდობა, რომელიც ქართველმა ხალხმა მის გუნდს გამოუცხადა.
"ჩვენ ხელი მოვაწერეთ ევროპასთან ასოცირების შეთანხმებას და დღეს გვეძლევა უნიკალური შანსი უკვე ჩვენი საქმიანობით, მთავრობის წარმატებული მუშაობით და ქვეყნის საბოლოო ევროპეიზაციით ახალი თავი ჩავწეროთ საქართველოს ისტორიაში. ჩვენ გვესმის ამ ეპოქის ისტორიული მნიშვნელობა და მისი თანმდევი პასუხისმგებლობა. და ეს პასუხისმგებლობა გვეკისრება ყველას, ვინც ამ დარბაზში ვსხედვართ, და მათაც, ვინც ახლა ჩვენ გვიყურებს. საქართველოს ყველა მოქალაქეს, მთელ საზოგადოებას ეძლევა საშუალება მონაწილეობა მიიღოს ჩვენი ქვეყნის ახალი ისტორიის შექმნაში. დღეს მინდა ამ ტრიბუნიდან მოგიწოდოთ ყველას, - მეგობრებო, გამოვიყენოთ ეს შესაძლებლობა, ეს ისტორიული შანსი და ყველამ ერთად ჩვენი ცოდნა, გამოცდილება და შრომა ჩვენი სამშობლოს წინსვლასა და აყვავებას, ნამდვილ ევროპულ ქვეყნად ქცევას მოვახმაროთ"- აღნიშნა ირაკლი ღარიბაშვილმა, პარლამენტში რიგგარეშე სესიაზე სიტყვით გამოსვლისას, სადაც მთავრობისთვის ნდობის გამოცხადების პროცესი მიმდინარეობს.
