,,ნაცმოძრაობის" წევრი მიხეილ მაჭავარიანი პროკურატურის მხრიდან სხვადასხვა ქვეყნის სისხლის სამართლის პრაქტიკოსი სპეციალისტების ჯგუფის საქართველოში მოწვევას ეხმიანება და აცხადებს, რომ კვალიფიციური უცხოელი სპეციალისტების რჩევები მისასალმებელიც იქნებოდა, რომ არა შემდეგი შემაშფოთებელი ფაქტორი:
,,პროკურატურის განცხადებამ ცხადყო, რომ მთელი ძალისხმევა გადატანილი აქვთ არა გაზრდილი დანაშაულისა და კორუფციის წინააღმდეგ ბრძოლაზე, არამედ ოპონენტების პოლიტიკური დევნის გაგრძელებაზე. დღევანდელი პროკურატურის ამოცანა უბრალოდ, იმ კრიტიკის განეიტრალებაა, რაც ამ მთავრობას დამსახურებულად ერგო საერთაშორისო ასპარეზზე. როგორც ჩანს, შემდეგი სამიზნე პრეზიდენტი სააკაშვილია, რომელიც აქტიურად მოღვაწეობს მსოფლიო ასპარეზზე უკრაინის მხარდასაჭერად და ჩართულია რუსეთის აგრესიის წინააღმდეგ საერთაშორისო კამპანიაში. პოლიტიკური ანგარიშსწორების სურვილით შეპყრობილ მთავრობას, მაინც გადაწყვეტილი აქვს საქართველოს პრეზიდენტის, მიხეილ სააკაშვილის წინააღმდეგ სისხლის სამართლებრივი დევნის წამოწყება მიუხედავად იმისა, რომ საქართველოს პარტნიორმა ქვეყნებმა, მაღალ პოლიტიკურ დონეზე , არა ერთხელ გააფრთხილეს საქართველოს მთავრობა, არ გადაედგათ ეს მცდარი ნაბიჯი. ამასთან, მას შემდეგ რაც საქართველოს ხელისუფლებამ ვერ აღმოაჩინა მიხეილ სააკაშვილის მიერ ,,მოპარული"მილიარდები, ისინი გადავიდნენ სახელმწიფო დაცვის სპეცსამსახურის თანამშრომლების, ადმინისტრაციის კვების ბლოკის უფროსის და დამლაგებლების დაბარებებზე და დაკითხვებზე", _განაცხადა მაჭავარიანმა.
მისივე თქმით, პროკურატურის ქმედებებისა და ბრალდებების მთავარი მოტივი არის პოლიტიკური დევნა.
,,გვინდა ერთი კითხვა და ერთი რჩევა მივცეთ მთავრობას: რა დაუჯდა ამ სპეციალისტების მოწვევა ბიუჯეტს? ვერანაირი კონსულტანტები ვერ უშველიან იმ ფაქტს, რომ პროკურატურის ქმედებებისა და ბრალდებების მთავარი მოტივი არის პოლიტიკური დევნა, მტკიცებულებები შეთითხნილია ივანიშვილის მითითებით, ისევე როგორც პროკურატურის ქმედებებია ნაკარნახევი", _განაცხადა მაჭავარიანმა.
