საქართველოს პარლამენტის თავმჯდომარე დავით უსუფაშვილი ისრაელის ახლად არჩეულ პრეზიდენტს, რეუვენ რივლინს შეხვდა. როგორც ,,ჯი-ეიჩ-ენს" პარლამენტიდან აცნობეს პრეზიდენტმა დავით უსუფაშვილს საქართველოს მიერ ასოცირების ხელშეკრულების ხელმოწერა მიულოცა და ევროპასთან უფრო მეტად დაახლოების პროცესში წარმატება უსურვა.
შეხვედრაზე მხარეებმა ისრაელში შექმნილ ვითარებაზე იმსჯელეს. პრეზიდენტი დაინტერესდა საქართველოს რუსეთთან ურთიერთობის საკითხებითაც. „მოხარული ვარ, რომ მომეცა საშუალება, შევხვედროდი საქართველოს პარლამენტის თავმჯდომარეს. ის ფაქტი, რომ ბატონი დავით უსუფაშვილი ჩვენთან ამ მძიმე დღეებში ჩამოვიდა, დიდ მეგობრობაზე მეტყველებს. ჩვენს ხალხს, პარლამენტსა და მთავრობებს მყარი მეგობრული ურთიერთობა გვაქვს და ვიმედოვნებ, რომ ეს მომავალშიც გაგრძელდება", - აღნიშნა შეხვედრის დასრულების შემდეგ, ჟურნალისტებთან საუბრისას ისრაელის სახელმწიფოს პრეზიდენტმა.
დაგეგმილია საქართველოს პარლამენტის თავმჯდომარის შეხვედრები ქნესეთის საგარეო საქმეთა და თავდაცვის კომიტეტის თავმჯდომარე ზეევ ელკინთან და ოპოზიციის ხელმძღვანელ ისააკ ჰერცოგთან.
