იუსტიციის მინისტრი თეა წულუკიანი პრეზიდენტ გიორგი მარგველაშვილის განცხადებას თბილისის ყოფილი მერის გიგი უგულავასთან დაკავშირებით ეხმიანება და აცხადებს, რომ მორატორიუმი არ იყო იმუნიტეტი, რის გამოც, სამართალდამცავებმა მიიღეს ის გადაწყვეტილება, რაც მიიღეს
,,გამოცხადებული მორატორიუმი პოლიტიკურად კეთილი ჟესტი იყო. ეს არსად არ წერია კანონში და შესაბამისად, პრემიერს არ ევალებოდა ამის გაკეთება, მაგრამ მან ეს გააკეთა. ეს კარგი ნაბიჯი იყო და ძალიან ბევრ რამეში საარჩევნო გარემო გააუმჯობესა. თუმცა, თუ ვინმემ და ვინმემ სახელად უგულავამ დაიწყო ცრუ მოძრაობები და დღე ერთი იყო და ორჯერ იმყოფებოდა აეროპორტში და ცდილობდა ქვეყნიდან მიმალვას, რა თქმა უნდა, აქ მორატორიუმი ვერ იმოქმედებდა. მორატორიუმი არ იყო იმუნიტეტი, ამიტომ სამართალდამცავმა ვორგანოებმა მიიღეს ის გადაწყვეტილება, რაც მიიღეს", _განაცხადა წულუკიანმა.
პრეზიდენტ გიორგი მარგველაშვილის განცხადებით, მისთვის სასიამოვნო არ იყო, როცა თბილისის ყოფილი მერის გიგი უგულავას დაკავება მორატორიუმის დროს მოხდა. მიუხედავად ამისა, როგორც მარგველაშვილმა ,,კავკასიის" ეთერში განცხადა უგულავას პოლიტპატიმრად არ მიიჩნევს.
,,ჩემთვის არ იყო სასიამოვნო, რომ მაინც და მაინც მორატორიუმის გამოცხადების მომენტში მოხდა გიგი უგულავას დაკავება. არა იმიტომ, რომ მე მიმაჩნია ეს პოლიტიკური დევნაა, არამედ პოლიტიკური თვალსაზრისით არასწორია გამოაცხადო მორატორიუმი და შემდეგ დააპატიმრო. Mორატოუმი, ეს არის რაღაცა დამატებითი ქმედება, რომლის ვალდებულებაც ხელისუფლებამ აიღო საკუთარ თავზე არჩევნების დროს. რა თქმა უნდა, ეს ჩემთვის, ჩემი აზრით, იყო შეუსაბამობა იმ განცხადებასთან, რომელიც მორატორიუმით განხორციელდა, მაგრამ რომ ვთქვა, რომ აქედან გამომდინარე, გიგი უგულავას პოლიტპატიმრად მივიჩნევ, მე ასეთი შეგრძნება არ მაქვს", _განაცხადა პრეზიდენტმა.
სამართალდამცავებმა უგულავა მორატორიუმის პროცესში დააკავეს და მას ორთვიანი წინასწარი პატიმრობა აქვს შეფარდებული.
