პარლამენტის აპარატის უფროსმა ზურაბ მარაქველიძემ საქართველოში ვიზიტად მყოფი დიდი ბრიტანეთის საპარლამენტთაშორისო კავშირის დელეგაციასთან გამართა შეხვედრა. ზურაბ მარაქველიძის განცხადებით, შეხვედრაზე საუბარი საქართველოს პარლამენტის ფუნქციებსა და სამომავლო გეგმებს შეეხო.
„ვისაუბრეთ ყველა იმ საკითხზე, რაც საპარლამენტო საქმიანობას ეხება. დელეგაციის წევრები დაინტერესდნენ იმ პრობლემებითაც, რაც პარლამენტის ქუთაისში გადმოტანამ შექმნა", - განაცხადა პარლამენტის აპარატის უფროსმა.
ზურაბ მარაქველიძის თქმით, შეხვედრაზე დიდ ბრიტანეთთან, როგორც უძველესი საპარლამენტო ტრადიციების მქონე ქვეყანასთან, საპარლამენტო გამოცდილების გაზიარების შესახებაც ისაუბრეს.
შეგახსენებთ, რომ დიდი ბრიტანეთის საპარლამენტთაშორისო კავშირის დელეგაციის ვიზიტი საქართველოში 20 ივლისს დაიწყო. ვიზიტის ფარგლებში ბრიტანელმა პარლამენტის წევრებმა ბათუმში გამართულ საერთაშორისო საპარლამენტო კონფერენციაში „საქართველოს შემდგომი ნაბიჯები ევროკავშირისკენ", მიიღეს მონაწილეობა. ასევე, გამართეს შეხვედრა საქართველოს პარლამენტის ევროპასთან ინტეგრაციის კომიტეტის თავმჯდომარესთან, ვიქტორ დოლიძესთან. დაგეგმილია დელეგაციის შეხვედრები აღმასრულებელი და ადგილობრივი ხელისუფლებისა და „ერთიანი ნაციონალური მოძრაობის" წარმომადგენლებთან.
