იუსტიციის მინისტრმა თეა წულუკიანმა ჟურნალისტებთან სამთავრობო ცვლილებები შეაფასა და აღნიშნა, ყოფილი მინისტრები კოალიცია ,,ქართული ოცნების" გუნდის წევრებად რჩებიან და გამორიცხული არაა რამდენიმე მათგანი, საპასუხისმგებლო თანამდებობებზე ვიხილოთ.
,,გარკვეულწილად შემშურდა ზოგიერთი ჩემი კოლეგის, რომელიც უკვე აღარ არის მინისტრი ვინაიდან, მათ აგვისტოში დასვენების საშუალება მიეცემათ. უფრო სერიოზულად კი გეტყვით რომ, რა თქმა უნდა, მე მათ რომლებთანაც ვმეგობრობ, ვესაუბრე და ისინი აბსოლუტურად მშვიდად შეხვდნენ ამ გადაწყვეტილებას. ისინი რჩებიან ჩვენი, გუნდის წევრებად და არ არის გამორიცხული, რამდენიმე მათგანი, თუ არა ყველა, სხვა საპასუხისმგებლო თანამდებობებზე ვიხილოთ, თუკი მათი სურვილი იქნება. მე ვიცი, რომ პრემიერის მხრიდან, მათ მომავალზე საუბარიც იყო, ეს უკვე მათი გადასაწყვეტია. რაც მთავარია, პოლიტიკური გუნდის წევრებად ისინი რჩებიან, ჩვენ ბრძოლას ვაგრძელებთ და ბრძოლის მიზანი არის ერთადერთი, რომ ერთხელ და სამუდამოდ, ამ ქვეყანაში პროგრესული სახელმწიფო შეიქმნას, რომლის გადაკეთებაც, გარდაქმნაც ვერც ერთი მომავალი მთავრობის შესაძლებლობაში ვერ იქნება, ", - განაცხადა წულუკიანმა.
შეგახსენებთ, რომ პრემიერ-მინისტრმა ირაკლი ღარიბაშვილმა გუშინ შვიდი მინისტრი დაკავებული თანამდებობიდან გაათავისუფლა.