კონსტიტუციონალისტი ავთანდილ დემეტრაშვილი ,,ჯი-ეიჩ-ენთან" საუბარში მინისტრთა კაბინეტის შემადგენლობაში განხორციელებულ ცვლილებებს ეხმიანება და აცხადებს, რომ ამ ეტაპზე მთავრობა და პრემიერ-მინისტრიც მოვალეობის შემსრულებლები არიან.
,,კონსტიტუცია ითვალისწინებს მთავრობისთვის ნდობის გამოცხადების პროცედურას რამდენიმე შემთხვევაში. ერთი, ეს არის ახალი მთავრობის შემქნის დროს, მეორე_როცა მთავრობის შემადგენლობის გარკვეული ნაწილი იცვლება, ხუთი მინისტრით მაინც. თუ ახალ მთავრობას პარლამენტის მიერ ნდობის გამოცხადება სჭირდება, წესით ძველ მთავრობას უფლებამოსილება უნდა შეუწყდეს და პრეზიდენტმა მას მოვალეობის შესრულება უნდა დააკისროს.შესაბამისად გამოდის, რომ არსებული მთავრობა მოვალეობის შემსრულებელია. არ ვიცი რა პოზიციიდან გამომდინარეობდა პრეზიდენტის ადმინისტრაცია, როცა პრეზიდენტმა თქვა, რომ ასეთი რამ არ განხორციელდება. პრეზიდენტმა მთავრობას მოვალეობის შესრულება არ დააკისრა", _განაცხადა დემეტრაშვილმა, რომელიც ,,ჯი-ეიჩ-ენის" კითხვას დაარღვია თუ არა გიორგი მარგველაშვილმა კონსტიტუცია, როცა მთავრობა მოვალეობის შემსრულებლად არ გამოცხადა პასუხობს:
,,ვფიქრობ, ეს არის კონსტიტუციის ძალიან თავისებური, ორიგინალური ინტერპრეტაცია. არა მგონია, ეს შეგნებულად კეთდებოდეს, უბრალოდ ეს არის პრეზიდენტის ადმინისტრაციისა და მთავრობის მიერ კონსტიტუციის ინტერპრეტაცია. კონსტიტუციაში გარკვეული ხარვეზი არსებობს და განმარტებისთვის არსებობს სპეციალური ორგანო_საკონსტიტუციო სასამართლო. დანარჩენ შემთხვევებში სახელმწიფო ინსტიტუტებს თავისებურად განმარტონ ესა თუ ის დებულება. მე როგორც, მეცნიერი, კონსტიტუციონალისტი ვფიქრობ, რომ ამ შემთხვევაში არის მთავრობის უფლებამოსილების შესრულების პროცედურა. შესაბამისად გამოდის, რომ მთავრობა და პრემიერ-მინისტრიც მოვალეობის შემსრულებლები არიან", - განაცხადა ,,ჯი-ეიჩ-ენთან" საუბარში დემეტრაშვილმა.