,,უხერხულია კიწმარიშვილის ოჯახის ტრაგედიით ზოგიერთი პოლიტიკოსის მხრიდან ამ ამბავზე სპეკულირება", _განაცხადა ჟურნალისტებთან ვიცე-პრემიერმა კახა კალაძემ, რომელიც ,,რუსთავი-2"-ში ყოფილი დიპლომატის ეროსი კიწმარიშვილის პანაშვიდზე იმყოფებოდა.
მისივე განმარტებით, კიწმარიშვილის საქმის გამოძიება მალე დასრულდება და სიმართლეს გავიგებთ.
,,ამ ადამიანის წვლილი ქართული მედიის ფორმირებაში, მის განვითარებაში უსაზღვროდ დიდია. გამოძიებას რაც შეეხება, დაველოდოთ მის დასრულებას და გავიგებთ ყველაფერს. ნაადრევად ცოტა უხერხულია კონკრეტულ მიმართულებებზე საუბარი. ვფიქრობ, გამოძიება ძალიან მალე დასრულდება და გავიგებთ სიმართლეს", - განაცხადა კალაძემ.
შეგახსენებთ, რომ ტელეკომპანია ,,რუსთავი-2"-ში ამავე ტელევიზიის დამფუძნებლის და ყოფილი დიპლომატის ეროსი კიწმარიშვილის სამოქალაქო პანაშვიდი მიმდინარეობს. სამ საათზე კი კიწმარიშვილის ცხედარს გამოასვენებენ და საბურთალოს პანთეონში დაკრძალავენ.
რუსთავის მერობის ყოფილი კანდიდატი ეროსი კიწმარიშვილი 15 ივლისს მისსავე ავტოფარეხში, გარდაცვლილი იპოვნეს. კიწმარიშვილის საქმესთან დაკავშირებით გამოძიება სსკ 115-ე მუხლით მიმდინარეობს, რაც თვითმკვლელობამდე მიყვანას გულისხმობს.
მასალის გამოყენების პირობები