სახალხო დამცველი შინაგან საქმეთა სამინისტროს განცხადებას ეხმიანება და აცხადებს, რომ შსს დაუყოვნებლივ უნდა დაიწყოს სამსახურებრივი შემოწმება 11 ივლისს ახალქალაქის პოლიციის განყოფილებაში მომხდარ ფაქტზე. ,,ჯი-ეიჩ-ენი" სახალხო დამცველის აპარატის მიერ გავრცელებულ განცხადებას უცვლელად გთავაზობთ: 2014 წლის 15 ივლისს საქართველოს სახალხო დამცველმა წინადადებით მიმართა საქართველოს შინაგან საქმეთა სამინისტროს, დაიწყოს დისციპლინური სამართალწარმოება შსს-ს ახალქალაქის პოლიციის განყოფილების თანამშრომლების წინააღმდეგ, რომლებმაც სახალხო დამცველის წარმომადგენელს 11 ივლისს დროებითი მოთავსების იზოლატორში შესვლის უფლება არ მისცეს. მედიის საშუალებებით გავრცელდა საქართველოს შინაგან საქმეთა სამინისტროს განცხადება, სადაც ნათქვამია, რომ სახალხო დამცველის ინფორმაცია სიმართლეს არ შეესაბამება და მის რწმუნებულ არმენ მარანგოზიანისათვის სამართალდამცველებს დაბრკოლებები არ შეუქმნიათ. შსს-ს განცხადებით, მოქალაქე, რომლის სანახავადაც მივიდა სახალხო დამცველის რწმუნებული, იმყოფებოდა დაკითხვაზე. პოლიციაში მისულ სახალხო დამცველის რწმუნებულს სამმართველოს უფროსის მოადგილემ განუმარტა, რომ აღნიშნული პირი შენობაში არ იმყოფებოდა.საქართველოს სახალხო დამცველი მიიჩნევს, რომ შინაგან საქმეთა სამინისტრომ დაუყოვნებლივ უნდა დაიწყოს სამსახურებრივი შემოწმება 11 ივლისს ახალქალაქის პოლიციის განყოფილებაში მომხდარ ფაქტზე. სახალხო დამცველის რწმუნებული პოლიციის განყოფილებაში იმყოფებოდა დროებითი მოთავსების იზოლატორის მოსანახულებლად და დაკავებულის ადგილსამყოფელის დასადგენად; მისი ვიზიტის მიზანს არ წარმოადგენდა პოლიციის უფროსის მოადგილის განმარტების მიღება.მიუხედავად იმისა, იმყოფებოდა თუ არა დაკავებული პირი დროებითი მოთავსების იზოლატორში, სახალხო დამცველის რწმუნებულს უნდა მისცემოდა პოლიციის განყოფილებაში დაუბრკოლებლად შესვლისა და იზოლატორის ნაწილის მონახულების საშუალება, რაც მოცემულ შემთხვევაში არ შესრულდა. შესაბამისად, ადგილი აქვს სახალხო დამცველის საქმიანობისთვის ხელის შეშლას", _აღნიშნულია განცხადებაში.