შსს სახალხო დამცველის უჩა ნანუაშვილის განცხადებას ეხმიანება და აცხადებს, რომ ინფორმაცია, თითქოს, პოლიციის თანამშრომლებმა სახალხო დამცველის აპარატის წარმომადგენელს მუშაობაში დაბრკოლება შეუქმნეს და მოქალაქესთან ვიზიტის განხორციელებაში ხელი შეუშალეს სიმართლეს არ შეესაბამება. როგორც ,,ჯი-ეიჩ-ენს" შსს საკითხის კომენტირებისას განუცხადეს 2014 წლის 11 ივლისს, საქართველოს სახალხო დამცველის რწმუნებული არმენ მარანგოზიანი მივიდა ახალქალაქის პოლიციის შენობაში მოქალაქის მოსანახულებლად, რომლის ოჯახის წევრთა ცნობით, მოწმის სახით დაკითხვა მიმდინარეობდა. სახალხო დამცველის რწმუნებულმა წარადგინა შესაბამისი მოწმობა, რის შემდეგ ის შევიდა პოლიციის შენობაში, მას გაესაუბრა სამმართველოს უფროსის მოადგილე, რომელმაც განუმარტა, რომ აღნიშნული პირი არ იმყოფებოდა სამმართველოში, რის შემდეგ სახალხო დამცველის აპარატის წარმომადგენელმა დატოვა პოლიციის შენობა.
,,ინფორმაცია იმის შესახებ, რომ პოლიციის თანამშრომლებმა სახალხო დამცველის აპარატის წარმომადგენელს მუშაობაში დაბრკოლება შეუქმნეს და მოქალაქესთან ვიზიტის განხორციელებაში ხელი შეუშალეს სიმართლეს არ შეესაბამება. შსს აქტიურად თანამშრომლობს სახალხო დამცველის აპარატთან და 2013-2014 წლების განმავლობაში საქართველოს სახალხო დამცველის აპარატის წარმომადგენლებმა დროებითი მოთავსების იზოლატორებში 140-მდე ვიზიტი განახორციელეს", _აცხადებენ შსს-ში.
შეგახსენებთ, რომ დღეს სახალხო დამცველი უჩა ნანუაშვილმა შინაგან საქმეთა სამინისტროს მიმართა და ახალქალაქში მომხდარ ფაქტზე ძალოვანი უწყებისგან რეაგირება მოითხოვა.
ნანუაშვილის განცხადებით, მისი წარმომადგენელი დროებითი მოთავსების იზოლატორში არ შეუშვეს, რაც, მისივე განმარტებით, კანონდარღვევაა.
მასალის გამოყენების პირობები
