პროკურატურამ დედაქალაქის ყოფილი მერის გიგი უგულავას მიმართ ერთ-ერთ ბრალდებაზე აღმკვეთ ღონისძიებად პატიმრობა და სიდედრის ბინის სახელმწიფო საკუთრებაში გადაცემა მოითხოვა.
თბილისის განვითარების ფონდის საქმეზე ბრალდების მხარის წარმომადგენელმა ნათია სონღულაშვილმა სასამართლოსთვის მიმართულ შუამდგომლობაში აღნიშნა, გიგი უგულავას ამ საქმეზე 50 ათასლარიანი გირაო აქვს შეფარდებული, რომლის სანაცვლოდ სიდედრის ბინაა ჩადებული.
თუმცა იმ მოტივით, რომ როგორც პროკურორი ამბობს, უგულავამ გირაოს პირობები დაარღვია, მას უნდა დაუდგინდეს აღმკვეთი ღონისძიება.
პროკურორი მოითხოვს, რომ თბილისის განვითარების ფონდის საქმეზე აღმკვეთი ღონისძიების სახით შეფარდებული გირაო გიგი უგულავას დაუმძიმდეს პატიმრობით, ხოლო ბინა, რომელიც ჩადებულია, მიეცეს აღსრულებაში.
აღნიშნული შუამდგომლობა სასამართლო პროცესზე გააპროტესტა გიგი უგულავამ, თუმცა, მის ადვოკატებს პოზიცია არ დაუფიქსირებიათ და პროცესის გადადება ითხოვეს. ადვოკატების პოზიცია აღნიშნულ საქმეზე 14 ივლისს გადადებულ პროცესზე გახდება ცნობილი.
