ბიზნეს პორტალი routesonline.com საქართველოში მსოფლიო ტურიზმის ორგანიზაციის, აბრეშუმის გზის პროგრამის შეხვედრას ეხმაურება. კონფერენცია მასშტაბური საავიაციო ფორუმის, Routes Silk Road 2014 ფარგლებში იმართება. შეხვედრას საქართველოს ტურიზმის ეროვნული ადმინისტრაცია მასპინძლობს. routesonline.com-ის რედაქტორი, რიჩარდ მასლენი თბილისურ შთაბეჭდილებას მკითხველს უზიარებს:
„დილით, როდესაც თბილისში მზე აცხუნებდა, აბრეშუმის გზის პროგრამის დელეგატებს საქართველოს დედაქალაქში გასეირნების საშუალება მიეცათ, თბილისის შესახებ მეტი ინფორმაციის მისაღებად და ისტორიის გასაცნობად ტური მოეწყო. ექსკურსია ტურიზმის ეროვნული ადმინისტრაციის ორგანიზებით გაიმართა. ავიაკომპანიებისა და აეროპორტების წარმომადგენლები თბილისის ისტორიულ ნაწილს ესტუმრნენ...
...ეს არის ევროპის სამხრეთ კიდეში მდებარე, მეხუთე საუკუნეში დაარსებული ქალაქი. იმის გამო, რომ თბილისი აღმოსავლეთსა და დასავლეთს შორის არსებულ სარფიან სავაჭრო გზაზეა, ქალაქი მთელი ისტორიის განმავლობაში იმპერიების ბრძოლის ცენტრს წარმოადგენდა. გლობალური ენერგო და სავაჭრო პროექტებში დღეს თბილისს მნიშვნელოვანი სატრანზიტო ფუნქცია აქვს. საქართველოს დედაქალაქი მრავალფეროვანი არქიტექურით გამოირჩევა, რომელიც შეზავებულია, შუასაუკუნეების, კლასიკური და საბჭოთა ნაგებობებით...
ისტორიულად, თბილისი სხვადასხვა ეთნოსის, კულტურისა და რელიგიის წარმომადგენლების საცხოვრებელ ქალაქ წარმოადგენს, თუმცა მართლმადიდებლობა დომინირებს. ტურისტებისათვის გამორჩეული მარშრუტებია: სამების საკათედრო ტაძარი, სიონის ეკლესია, თავისუფლების მოედანი, ნარიყალა, ოპერა და ეროვნული მუზეუმი. დელეგატები აღფრთოვანებულები არიან იმ შეთავაზებით რაც ამ ქალაქს გააჩნია. „ აქ არის ძველის და ახლის, ტრადიციულობისა და მოდერნიზმის წარმოუდგენლი ნაზავი, თბილისს აქვს უნიკალური ლანდშაფტი და ატმოსფერო." აცხადებს შტუტგარტის აეროპორტის, მიმოსვლის განვითარების ხელმძღვანელი თომას ჰელტონი.
თბილისით აღფრთოვანებულია ბუდაპეშტის აეროპორტის ბიზნესის განვითარების ხელმძღვანელი ბალაზ ბოგატი.: „ თბილისით ძალიან გაოცებული ვარ, ჩემს გონებაში მქონდა წარმოდგენა ამ ქალაქის შესახებ, მაგრამ რაც ვნახე ვერც კი შეედრება, ჩემს წარმოდგენებს. ეს არის მდიდარი, მრავალფეროვანი სტილისა და კულტურის ქალაქი, ეს მართლაც რომ მშვენიერი ადგილია.
