შეხვედრაზე განიხილეს სამშენებლო სექტორში არსებული ვითარება და დარგის განვითარებისთვის საჭირო ღონისძიებები. როგორც ცნობილია, მიმდინარე წლის იანვარ-მაისში 13%-ითაა გაზრდილი ეკონომიკური აქტივობა, საიდანაც ყველაზე მაღალი მაჩვენებელი - 28,5%-ი სწორედ სამშენებლო სექტორს უკავია, ასევე 21.0%-ით გაზრდილია ოპერაციები უძრავი ქონებით და იჯარით.

ფინანსთა მინისტრმა სამშენებლო სექტორის წარმომადგენლებს გააცნო მიმდინარე წლის იანვარ-მაისში ეკონომიკური ზრდის დადებითი ტენდენციები, ქვეყნის მაკროეკონომიკურ მაჩვენებლები, საგადასახადო შემოსავლების კუთხით 6 თვეში არსებული დინამიკა, საგარეო ვალის შემცირების მონაცემები.

ხელისუფლების წარმომადგენლებმა მოისმინეს წინადადებები და მოსაზრებები, თუ რა უნდა გაკეთდეს სახელმწიფო და კერძო ინფრასტრუქტურული პროექტების კიდევ უფრო გააქტიურებისა და ამ მიმართულებით ინვესტიციების მოზიდვის კუთხით, ასევე საკანონმდებლო ბაზის სრულყოფისათვის.

საუბარი შეეხო ისეთ აქტუალურ საკითხებს, როგორიცაა: ქვეყნის ურბანული პოლიტიკა, საბანკო სექტორს, დეველოპერულ კომპანიებსა და სახელმწიფოს შორის ურთიერთობა, შესყიდვების კანონმდებლობა, საერთაშორისო გამოცდილების გაზიარება ტექნიკური და საპროექტო წინადადებების მომზადების მიმართულებით, დარგის განვითარებისთვის ინოვაციური პროექტების ხელშეწყობის აუცილებლობა, საგადასახადო ბაზის სრულყოფა და სხვა.

„შედგა ძალიან საინტერესო შეხვედრა. სამშენებლო სექტორის წარმომადგენლებს გავაცანით მაკროეკონომიკური პარამეტრები. მნიშვნელოვანია, რომ 6 თვეში 103%-ით შესრულებულია საგადასახადო შემოსავლების გეგმა და წინა წლის შესაბამის პერიოდთან შედარებით 250 მლნ ლარზე მეტია მობილიზებული. ბუნებრივია, სამშენებლო სექტორში არსებობს პრობლემები, რომელზეც დღეს ღიად ვისაუბრეთ და შევთანხმდით, რომ გაგრძელდება მუშაობა პრობლემების აღმოსაფხვრელად, რაც ამ დარგს უფრო კონკურენტუნარიანს გახდის," - განაცხადა ფინანსთა მინისტრმა, ნოდარ ხადურმა.

„წლის პირველ ნახევარში რეგიონული განვითარებისა და ინფრასტრუქტურის სამინისტრომ საჯარო ინფრასტრუქტურულ პროექტებში 305 მლნ ლარზე მეტი დახარჯა, რაც უპრეცედენტო მაჩვენებელია ბოლო წლების განმავლობაში. ჩვენთვის უცხო არ არის ის პრობლემატიკა, რომელიც აქვს სამშენებლო სექტორს და საერთო ინტერესია ამ საკითხების მოგვარება. მათი ძირითადი ნაწილი მემკვიდრეობითია და უკავშირდება კომპანიების საპროექტო და საკანონმდებლო ხარვეზებს, ფინანსურ პრობლემებს. ვფიქრობ, წელს შევძლებთ ამ მიმართულებით საკითხების მოგვარებას და მომავალი წლიდან გაცილებით თავისუფალი და ეფექტური იქნება მშენებლების საქმიანობა, განსაკუთრებით, ინფრასტრუქტურულ პროექტებში," - აღნიშნა რეგიონული განვითარებისა და ინფრასტრუქტურის მინისტრის მოადგილემ თეიმურაზ მურღულიამ.

შეხვედრას ასევე დაესწრნენ ფინანსთა მინისტრის მოადგილე ლაშა ხუციშვილი, ეკონომიკისა და მდგრადი განვითარების მინისტრის მოადგილე მიხეილ ჯანელიძე, შემოსავლების სამსახურის უფროსი ირაკლი გვარამაძე.