თუშეთში ასულ ტურისტებს წელს სიახლეები ელოდებათ. როგორც თუშეთის დაცული ტერიტორიების ადმინისტრაციის დირექტორი ანზორ გოგოტიძე, კახეთის საინფორმაციო ცენტრთან საუბრისას აცხადებს, წელს ტურისტებს ერთ-ერთი სიახლე, რაც თუშეთში ელოდებათ, ომალოსთან ახლოს განთავსებული - გადასახედი ქუეშია, საიდანაც ნიამორებზე დაკვირვება იქნება შესაძლებელი.
„წელს საინტერესო სიახლე იწყება: „თიბისი ფონდმა" დააფინანსა ინიციტივა ალაზნის თავში ტურისტული თავშესაფრის მოწყობისა და ტურისტული მარშრუტის გაკეთების შესახებ. ეს არის ალაზნის თავის მარშრუტი ბორბალოს მიმართულებით. აქ იქნება 18 კაცზე მოწყობილი თავშესაფარი. აქ მოგეხსენებათ, საავტომობილო გზა არ მიდის. იქნება საფეხმავლო გადასასვლელები ფშავსა და ხევსურეთში.
მოგეხსენებათ ფშავ-ხევსურეთში დაარსდა ეროვნული პარკი და იქაც შესაბამისი ინფრასტრუქტურა განვითარდება. ერთიან კომპლექსში მოვაქცევთ თუშეთსა და ფშავ-ხევსურეთს. ამავე დროს ეს ბილიკი საშუალებას მოგვცემს უფრო მეტად დავტვირთოთ გომეწრის ალაზნის ხეობა, მეტად დავტვირთით აქაური სასტუმროები. მაგალითისთვის რომ ავიღოთ ულამაზესი სოფელი დოჭუ, სადაც სასტუმროები კი გვაქვს, მაგრამ ფაქტობრივად, არ მუშაობენ"- აცხადებს ანზორ გოგოტიძე.
მისივე განმარტებით, ბილიკი არა მხოლოდ დატვირთავს ხეობაში მდებარე სასტუმროებს, არამედ, ახალ სასტუმროებსაც გააჩენს.
პროექტის განხორციელება „თიბისი ფონდს" 100 ათასი ლარი უჯდება და შესაბამისი ინფრასტრუქტირის მშენებლობის დასრულება სექტემბერში იგეგმება. როგორც „თიბისი ფონდში" განმარტავენ, ისინი სამომავლოდაც გააგრძელებენ მსგავსი მიმართულებების დაფინანსებას, რადგანაც სწორედ ასეთი პროექტებით ხდება ადგილობრივი მოსახლეობის სოციალურ ეკონომიკური მდგომარეობის გაუმჯობესება.
