თავდაცვის ყოფილ მინისტრს ბაჩო ახალაიას 30 000 ლარიანი გირაოს ნაცვლად, პატიმრობა შეეფარდა. გადაწყვეტილება თბილისის საქალაქო სასამართლომ დღეს გამოიტანა. თავად ბაჩო ახალაიას ადვოკატები კი 30 000 ლარიანი გირაოს შეფარდებას ითხოვენ. მოთხოვნით დაცვის მხარემ მოსამართლეს სასამართლო პროცესზე მიმართა, სადაც ბაჩო ახალაიასთვის აღმკვეთი ღონისძიების შეფარდების საკითხზე მსჯელობდნენ.
ახალაიას ადვოკატები არ გამორიცხავენ, რომ საქმეს გაასაჩივრებენ.
"დიდი ალბათობით, აუცილებლად გავასაჩივრებთ. სამომავლო გეგმებისთვის, რომ ეს გადაწყვეტილება აისახოს ევროსასამართლოს გადაწყვეტილებებში, ამის გამო, სავალდებულოა ყველა ინსტანციის გავლა. რაიმე სხვა იმედი არ გაგვაჩნია, უბრალოდ, ვალდებულებიდან გამომდინარე, უნდა გაიაროს ეტაპი, ჩვენ გავასაჩივრებთ ამ გადაწყვეტილებას", - განაცხადა ბაჩო ახალაიას ადვოკატმა მალხაზ ველიჯანაშვილმა.
შეგახსენებთ, რომ სასამართლომ დღეს რუსეთის სასარგებლოდ ჯაშუშობის ბრალდებით დაკავებულთა წამების ორგანიზების საქმეზე იმსჯელა, რომელთა შორის არის სერგო თეთრაძის მკვლელობის ეპიზოდი.
