TBC აზერბაიჯანში ქსელს აფართოებს. 1-ელ ივლისს, აზერბაიჯანის ქალაქ ხაჩმაზში TBC Bank-ის, აზებაიჯანის წარმომადგენლობის - TBC Kredit-ის ფილიალი გაიხსნა. გახსნის ღონისძიებაში მონაწილეობა მიიღეს, TBC Kredit-ის მენეჯმენტის, ასევე TBC Bank-ისა და Enclude Holding-ის სამეთვალყურეო საბჭოს წევრებმა. ახლად გახსნილ ფილიალში განხორციელდება მცირე და საშუალო ბიზნესის დაკრედიტება, ასევე გაიცემა სამომხმარებლიო სესხები.
"აზერბაიჯანში სწორედ ხაჩმაზიდან დავიწყეთ რეგიონალური ქსელის გაფართოება. ჩვენ მოხარულნი ვართ, რომ ამ რაიონის მოსახლეობას ჩვენს მომსახურებასა და სერვისებს შევთავაზებთ. დარწმუნებულნი ვართ ჩვენი ბიზნესის წარმატებაში და ჩვენი თანამშრომლების პროფესიონალიზმში", - განაცხადა TBC Kredit-ის დირექტორმა დავით კიღურაძემ.
არასაბანკო საკრედიტო ორგანიზაცია TBC Kredit-ი აზერბაიჯანში 1999 წლიდან ფუნქციონირებს. დღემდე მას წარმომადგენლობები ძირითადად ბაქოსა და სუმგაიტში ქონდა. შეგახსენებთ, რომ 2007 წლიდან TBC Kredit-ის 75% TBC Bank-ს, ხოლო 25%-ი ამერიკულ Enclude Holding-ს ეკუთვნის
