რუმინეთის პარლამენტმა ასოცირების ხელშეკრულების რატიფიცირების პროცესი დაასრულა. პარლამენტის ქვედა პალატამ ასოცირების შესახებ შეთანხმება რიგგარეშე სხდომაზე, ხმათა აბსოლუტური უმრავლესობით, 298 ხმით არცერთის წინააღმდეგ დაამტკიცა. ქვედა პალატის შემდეგ, ხელშეკრულება რატიფიცირებისთვის რუმინეთის სენატს გადაეგზავნა. სენატორებმა ასოცირების შესახებ შეთანხმების რატიფიცირება 111 ხმით არც ერთის წინააღმდეგ მოახდინეს.
ხელშეკრულების ირგვლივ დებატებში ქვეყნის პრემიერ-მინისტრი ვიქტორ პონტა და საგარეო საქმეთა მინისტრი ტიტუს კორლაციანი მონაწილეობდნენ. მათ ამ ქვეყნებსა და ევროკავშირს შორის ასოცირების შესახებ შეთანხმებების გაფორმებას ისტორიული მოვლენა უწოდეს. რუმინეთის პრემიერ-მინისტრმა კანონმდებლებს რუსეთის მხრიდან შესაძლო გართულებების თავიდან ასაცილებლად საქართველოს, მოლდოვისა და უკრაინის ევროპული მისწრაფებების მხარდაჭერის გაძლიერებისაკენ მოუწოდა.
აღსანიშნავია, რომ რუმინეთი ევროკავშირის პირველი წევრი სახელმწიფოა, რომელმაც ასოცირების შესახებ შეთანხმებების რატიფიცირება მოახდინა. რუმინეთის მხრიდან ეს გახლავთ საქართველოს, მოლდავეთისა და უკრაინის ევროპული ინტეგრაციის პროცესის ურყევი მხარდაჭერის კიდევ ერთი დემონსტრირება.
ევროკავშირის წევრი სახელმწიფოების პარლამენტების, ევროპარლამენტისა და საქართველოს პარლამენტის მიერ რატიფიცირების შემდეგ ევროკავშირთან ასოცირების შესახებ შეთანხმება სრულად შევა ძალაში.