თბილისის ყოფილი მერი გიგი უგულავა მოდულის შენობაში ადვოკატებმა მოინახულეს. ისინი უგულავასთან, დაახლოებით, ერთი საათის განმავლობაში იმყოფებოდნენ.
ადვოკატების განცხადებით, მათთვის ამ დრომდე საქმის მასალები არ გადაუციათ. როგორც ადვოკატები განმარტავენ მათი დაცვის ქვეშ მყოფი დაკავება დარღვევებით მოხდა.
,, შევხვდით გიორგი უგულავას, მას დაკავების შემდგომ არ განუმარტეს დაკავების ფაქტობრივი გარემოებები თუ რას ედავებოდნენ, რა თემაზეა დაკავებული საერთოდ წარმოდგენა არ აქვს. უბრალოდ ზედაპირულად იცის რომ ეს არის უკანონო შემოსავლების ლეგალიზაციასთან დაკავშირებული დაკავება. უგულავა აცხადებს, რომ ფინანსთა სამინისტროს საგამოძიებო სამსახურში გადაყვანის შემდეგ ითხოვდა დაუყოვნებლივ ადვოკატთან შეხვედრას, თუმცა ამის უფლება არ მისცეს. იგი არ აღიარებს არანაირ ბრალს", _განაცხადა ადვოკატმა გიორგი გელხაურმა.
მისივე განმარტებით, უგულავასთვის ბრალი ამ დრომდე არ წაუყენებიათ, ბრალის წაყენება 48 საათის განმავლობაში უნდა მოხდეს.
შეგახსენებთ, რომ დაკავებული თბილისის ყოფილი მერი ამ დროისთვის მოდულის შენობაში რჩება.
