საქართველომ შესაძლოა, სომხეთს სატრანზიტო გზის გამოყენებისათვის დამატებითი გადასახადები მოსთხოვოს. აღნიშნულის შესახებ სომეხმა ეკონომისტმა ვაგი ხაჩატრიანმა განაცხადა. მისი არგუმენტით, საქართველოს მიერ ევროკავშირთან ასოცირების ხელშეკრულების გაფორმებამ, შესაძლოა, ტარიფების ზრდა გამოიწვიოს. ეკონომისტი აღნიშნავს, რომ ორ ქვეყანას შორის იმოქმედებს აბსოლიტურად განსხვავებული სატარიფო რეჟიმები. სომხეთში - საბაჟო კავშირის ხოლო, საქართველოში ევროკავშირის კრიტერიუმების შესაბამისი.
აღნიშნულის შესახებ, როგორც "ჯი-ეიჩ-ენს" ეკონომიკისა და მდგრადი განვითარების სამინისტრიოში განუცხადეს, 2014 წლის 27 ივნისს ხელმოწერილი ევროპასთან ასოცირების შეთანხმება საგზაო ინფრასტრუქტურის გამოყენებასთან დაკავშირებით ითვალისწინებს, მხოლოდ 1999 წლის 17 ივნისის ევროპარლამენტისა და საბჭოს დირექტივას 1999/62/EC გარკვეული ინფრასტრუქტურის გამოყენებისთვის მძიმეწონიანი ტვირთების გადამზიდი ავტოსატრანსპორტო საშუალებების დაბეგვრის შესახებ. (DIRECTIVE 1999/62/EC OF THE EUROPEAN PARLIAMENT AND OF THE COUNCIL of 17 June 1999 on the charging of heavy goods vehicles for the use of certain infrastructures)
სამინისტროში განმარტავენ, რომ აღნიშნული დირექტივის მიზანია საავტომობილო სატვირთო გადაზიდვების პროცესში სატრანსპორტო კომპანიებს შორის ჯანსაღი კონკურენციის პირობების დანერგვა გადასახადების სისტემის ჰარმონიზაციისა და საგზაო ინფრასტრუქტურის გამოყენების გადასახადების გადამზიდველებზე სამართლიანად გადანაწილების გზით.
"დირექტივა ვრცელდება მხოლოდ იმ მძიმეწონიან სატვირთო ავტოსატრანსპორტო საშუალებებზე, რომელთა სრული (დატვირთული) მასა აღემატება 12 ტონას", - აცხადებენ ეკონომიკის სამინისტროში.
სამინისტრო მიუთითებს, რომ დირექტივის დებულებები ითვალისწინებს საგზაო ინფრასტრუქტურის გამოყენების გადასახადების დაწესების არადისკრიმინაციულ ხასიათს და უფრო ეკოლოგიურად სუფთა ავტოსატრანსპორტო საშუალებების მიერ გზების გამოყენების წახალისებას გადასახადების დიფერენცირების გზით, იმ პირობით, რომ ასეთი დიფერენციაცია გავლენას არ მოახდენს შიდა ბაზრის ფუნქციონირებაზე. გადასახადები დიფერენცირებულია ასევე ავტოსატრანსპორტო საშუალებების სრული მასისა და ღერძების რაოდენობის მიხედვით.
აღნიშნული დირექტივის მოთხოვნები საქართველოს კანონმდებლობაში პრაქტიკულად არ არის ასახული და სატვირთო ავტოსატრანსპორტო საშუალებების მიმართ ინფრასტრუქტურის გამოყენების გადასახადი (საქართველოს ტერიტორიაზე სატრანზიტო ინფრასტრუქ¬ტურის უტილიზაციისათვის) საქართველოს კანონმდებლობით დაწესებულია მხოლოდ საქართველოს ტერიტორიაზე ტრანზიტულად გამავალ დატვირთულ ავტოსატრანსპორტო საშუალებებზე 200 ლარის ოდენობით (საავტომობილო გზების შესახებ" საქართველოს კა¬ნო¬ნის 142 მუხლისა და 144 მუხლის მე-2 პუნქტის შესაბამისად საქართველოს მთავრობის 2010 წლის 28 ივლისის N213 დადგენილებით "გზათსარგებლობის საფასურის ოდენობისა და მის გადახდასთან დაკავშირებული პროცედურებისა და პირობების განსაზღვრის თაობაზე" დაწესებული გადასახადი) და ის დიფერენცირებულ ხასიათს (ავტოსატრანსპორტო საშუალებების სრული მასის მიხედვით) არ ატარებს.
სამინისტრო ასევე მიუთითებს, რომ დირექტივის იმპლემენტაციასთან მიმართებით დაფიქსირებულია შემდეგი: „ამ დირექტივის დებულებები შესრულდება მას შემდეგ, რაც საქართველო გადაწყვეტს, რომ გარკვეული ინფრასტრუქტურის გამოყენებისთვის შემოიღოს გარკვეული ზომები ან მოსაკრებელი".
"ზემოაღნიშნულიდან გამომდინარე დირექტივა არ ეხება მარტო ტრანზიტულ გადაზიდვებს და მით უმეტეს არ შეიძლება იქნეს გამოყენებული მხოლოდ სომხეთის გადამზიდველების მიმართ. ამასთან, რაიმე კონკრეტული ვადა ამ დებულებების ქართულ კანონმდებლობაში იმპლემენტაციის თაობაზე დაფიქსირებული არ არის და დამოკიდებულია საქართველოს ხელისუფლების გადაწყვეტილებაზე. გარდა ამისა, მიმდინარეობს მუშაობა დღეისათვის მოქმედი ზემოაღნიშნული 200 ლარიანი გზათსარგებლობის საფასურის ისეთი სახეცვლილების თაობაზე, რომელიც უფრო სამართლიანი იქნება ნებისმიერი ქვეყნის გადამზიდველების მიმართ და დამყარებული იქნება მოწინავე ევროპული ქვეყნების გამოცდილებაზე", - განმარტავს სამინისტრო.
