„გუდვილის" რეაბილიტაციის გეგმის შეთანხმების პროცედურები დასრულდა. რამდენიმე წლიანი გეგმის მიხედვით კომპანია „გუდვილი" სტაბილურად გააგრძელებს ფუნქციონირებას ქართულ რითეილ ბაზარზე და სამომავლოდ გაფართოებასაც აპირებს.
„გუდვილის" რეაბილიტაციის გეგმა თავად „გუდვილმა", „თიბისი ბანკმა" და კრედიტორებმა ერთობლივად შეიმუშავეს. შეთანხმებული გეგმის მიხედვით „გუდვილი" სააქციო საზოგადოებად გარდაიქმნება, რაც მნიშნველოვნად დააჩქარებს რეაბილიტაციის გეგმის შესრულებას და ბიზნესის წარმატებას.
„გუდვილის" მენეჯმენტის განცხადებით, ჰიპერმარკეტების ქსელი მომგებიანი კომპანიაა, მისი რეალიზაციის მაჩვენებელი სტაბილურად მზარდია, რაც ოპტიმისტურ განწყობას უქმნის ყველა კრედიტორს, რომლებიც თავის მხრივ კომპანიის აქციების შეძენით არიან დაინტერესებულნი და სააქციო საზოგადოების წევრებად მოიაზრებიან.
„რეაბილიტაციის პროცესის განხორციელებას ხელი შეუწყო „გუდვილისა" და „თიბისი ბანკის" მენეჯმენტის გონივრულმა გადაწყვეტილებებმა. რამდენიმე თვიანი მუშაობის შედეგად, პროცესის ორივე მხარემ მნიშვნელოვანი სამუშაო გაწიეს, რათა შეთანხმებულიყო ყველა სადაო საკითხი. „გუდვილი" კერძო ბიზნესია, რომელიც დამოუკიდებელ და გამჭირვალე ბიზნესსაქმიანობას უცვლელად აგრძელებს. „გუდვილი" უპირობოდ იღებს ვალდებულებას კრედიტორებთან ნორმალიზებულ ვითარებაში საქმიანი ურთიერთობების გაგრძელებაზე და დავალიანებების დაფარვაზე შეთანხმებული გრაფიკებით. „გუდვილის" სააქციო საზოგადოებად გარდაქმნა კი მხოლოდ წარმატების გარანტია. ჩვენ მადლობას ვუხდით პროცესში ჩართულ კრედიტორებს მოთმინებისა და „გუდვილის" მხარდაჭერისთვის."- ნათქვამია „გუდვილის" მიერ გავრცელებულ განცხადებაში.
