„ჩვენი ამოცანაა, ორი ქვეყნის ბიზნესწრეებს მივცეთ საშუალება მჭიდრო პარტნიორული ურთიერთობა დაამყარონ", აცხადებენ „საქართველო-ირანის გაერთიანებული სავაჭრო-სამრეწველო პალატაში", რომელიც დღეისათვის 100-ზე მეტ სუბიექტს აერთიანებს.
როგორც პალატაში განმარტავენ, პალატის მთავარ ამოცანას წარმოადგენს საინტერესო საინვესტიციო და ინოვაციური პროექტები, საქართველოს ბაზარზე ახალი პროდუქციის შექმნა, ასევე, ექსპორტის განხორციელება ირანის ისლამურ რესპუბლიკაში.
როგორც ცნობილია, მიმდინარე წლის 31 იანვარს თბილისში აიპ „საქართველო-ირანის გაერთიანებული სავაჭრო-სამრეწველო პალატა" დაფუძნდა, რომლის მთავარი მიზანია უზრუნველყოს ქვეყნებს შორის გრძელვადიანი და ორმხრივად საინტერესო ეკონომიკური თანამშრომლობა.
პალატა დღეისთვის თავის რიგებში აერთიანებს 100-ზე მეტ ქართულ და ირანულ კომპანიას, რომლებიც სხვადასხვა სფეროში მოღვაწეობენ და აქტიურ როლს ასრულებენ ორ ქვეყანას შორის ეკონომიკური ურთიერთობის განვითარებაში. ფუნქციონირებს 6 დარგობრივი კომიტეტი - ვაჭრობის, სატრანსპორტო, ტურიზმის, ნავთობპროდუქტების, საინჟინრო-ტექნიკური და სოფლის მეურნეობის კომიტეტები, ასევე, მოწვეული ექსპერტები და სპეციალისტები.
გასულ წელს სავაჭრო ბრუნვამ ირან-საქართველოს შორის 180 მილიონი დოლარი შეადგინა. ყოველწლიურად საქართველოში 10 000-მდე ირანელი ვიზიტორი შემოდის და 100 მილიონამდე დოლარი რჩება სახელმწიფოში. ყველაზე მეტად განვითარებულია შემდეგი სფეროები: ინფრასტრუქტურის მშენებლობა (საგზაო ბიტუმის პროდუქტი - ასფალტის წარმოების ერთ-ერთი მთავარი კომპონენტი; აღსანიშნავია, რომ საგზაო ბიტუმის 98% შემოდის ირანიდან), ტურიზმი, ვაჭრობა, მშენებლობა, სოფლის მეურნეობა.
„ჩვენი ამოცანაა ორი ქვეყნის ბიზნეს წრეებს მივცეთ საშუალება დაამყარონ მჭიდრო პარტნიორული ურთიერთობა, რაც ვფიქრობთ, იქნება წინაპირობა, ეფექტურად გამოვიყენოთ ირანის ისლამური რესპუბლიკის შესაძლებლობები.
საინტერესო საინვესტიციო და ინოვაციური პროექტები, საქართველოს ბაზარზე ახალი პროდუქციის შექმნა, ასევე, ექსპორტის განხორციელება ირანის ისლამურ რესპუბლიკაში - ეს გახლავთ მთავარი პრიორიტეტები ჩვენს საქმიანობაში"- აცხადებენ პალატაში.
