„ვითიბი ბანკისა" და კავკასიის უნივერსიტეტმა სტრატეგიული პარტნიორობის გაღრმავებას იწყებენ. უკვე ოფიციალურად გაკეთდა განცხადებები, რომ ბანკი და უნივერსიტეტი ერთობლივ პროექტს განახორციელებენ, რომელიც ითვალისწინებს სტიპენდიის დანიშვნას იმ აბიტურიენტებისთვის, რომლებიც ეროვნულ გამოცდებზე უმაღლეს ქულებს აიღებენ და კავკასიის უნივერსიტეტის სტუდენტები გახდებიან. ამასთან ერთად უნივერსიტეტის მესამე და მეოთხე კურსის სტუდენტები სტაჟირებას გაივლიან ვითიბი ბანკში. სტაჟირების წარმატებით გავლის შემთხვევაში კი დასაქმდებიან ბანკის სხვადასხვა დეპარტამენტებში და ფილიალებში. სტაჟირების გავლა შესაძლებელი იქნება ბიზნესის, სამართლის, მედია ტექნოლოგიების და სახელმწიფო მართვის ფაკულტეტების სტუდენტებისთვის. აღნიშნული პროექტი ხორციელდება კავკასიის უნივერსიტეტისა და ვითიბი ბანკის სტრატეგიუილი პარტნიორობის ფარგლებში, რომელიც პირველ რიგში ბანკის მიერ უმაღლესი სასწავლებლის ფინანსურ მხარდაჭერას ითავლისწინებს.
„მინდა განვაცხადო, რომ ძალიან საინტერესო და მნიშვნელოვანი შეთანხმება შედგა, ვითიბი ბანკი და კავკასიის უნივერსიტეტი პარტნიორობის შემდგომ ეტაპზე გადავიდნენ, რომელიც პირველ რიგში ითვალისწინებს ფინანსურ მხარდაჭერას იმ აბიტურიენტებისთვის რომლებიც სასწავლებლად კავკასიის უნივერსიტეტს აირჩევენ. ვფიქრობთ, ეს საკმაოდ მიმზიდველი წინადადებაა, რადგან საქართველოს წამყვან უნივერსიტეტში სწავლის შესაძლებლობასთან ერთად ვითიბი ბანკის სტიპენდიანტობის შესაძლებლობა ეძლევათ. ვითიბი ბანკის თანამშრომელთა შორის უკვე მრავალად არიან ამ უნივერსიტეტის კურსდამთავრებულები, ჩვენ მზად ვართ დღევანდელ სტუდენტებს, ჩვენს ბანკში სტაჟირების და კვალიფიკაციის ამაღლების შესაძლებლობა მივცეთ", - განაცხადა „ვითიბი ბანკის" ვიცე პრეზიდენტმა გიორგი ბარკალაიამ.
„ვითიბი ბანკთან თანამშრომლობა სულ უფრო საინტერესო ხდება უნივერსიტეტისთვის; დიდი მადლობა მინდა ვუთხრა ჩვენს მეგობარ ბანკს ამ საინტერესო შეთავაზებისთვის; იმედი მაქვს, სტუდენტები გამოიყენებენ შანსს, რომელიც მათ ამ თანამშრომლობის შედეგად ეძლევათ", - აღნიშნა კავკასიის უნივერსიტეტის პრეზიდენტმა კახა შენგელიამ.
აღსანიშნავია, რომ „ვითიბი ბანკი" (ჯორჯია), ვითიბის საერთაშორისო ფინანსური ჯგუფის წევრია. დღეს ვითიბი ჯგუფის ბანკები 20-ზე მეტ ქვეყანაშია წარმოდგენილი. ვითიბი ჯგუფის უნივერსალური მოდელი მოიცავს: კორპორატიულ, საცალო და საინვესტიციო ბიზნესს.
კავკასიის უნივერსიტეტი კავკასიის რეგიონის ერთ-ერთი წამყვანი სასწავლებელია. შეგახსენებთ, რომ უნივერსიტეტი სტუდენტთა დასაქმების სტატისტიკით ერთ-ერთ წამყვან პოზიციაზეა საქართველოში აკრედიტებულ უმაღლეს სასწავლებლებს შორის.