საქართველო-გერმანიის ფინანსური თანამშრომლობის გაღრმავების შესახებ ისაუბრეს საქართველოს პრემიერ-მინისტრმა ირაკლი ღარიბაშვილმა და გერმანიის განვითარების ბანკის KFW-ის წარმომადგენლებმა დღეს გამართულ შეხვედრაზე.
საქართველოს მთავრობის მეთაურმა ხაზი გაუსვა ფინანსური თანამშრომლობის ფარგლებში საქართველოსთვის გრანტისა და შეღავათიანი სესხის სახით გამოყოფილი თანხის მნიშვნელობას, რომლის მოცულობაც დაახლოებით 465 მილიონ ევროს შეადგენს.
ირაკლი ღარიბაშვილმა გერმანიის განვითარების ბანკის წარმომადგენლებს თანამშრომლობისთვის მადლობა გადაუხადა და განაცხადა, რომ გერმანიის მეშვეობით ფინანსდება საქართველოსთვის ისეთი მნიშვნელოვანი პროექტები, როგორებიცაა შავი ზღვის ელექტროგადამცემი ქსელის პროექტი; ბათუმში წყლისა და კანალიზაციის ინფრასტრუქტურის მოწესრიგება; ასევე იწყება ჯვარი-ხორგას ელექტროგადამცემი ხაზის მშენებლობა და ქუთაისში ახალი ნაგავსაყრელის მშენებლობა, რომელიც ქუთაისის გარდა ხუთ მიმდებარე რაიონს მოემსახურება.
საქართველოს პრემიერ-მინისტრთან შეხვედრას გერმანიის ეკონომიკური თანამშრომლობისა და განვითარების სამინისტროს წარმომადგენელი კლაუს ტანცბერგერი, KFW-ის პირველი ვიცე-პრეზიდენტი, კავკასიისა და აღმოსავლეთ ევროპის ქვეყნების დირექტორი ევა ვიტი, KFW-ის სამხრეთ კავკასიის წარმომადგენლობის დირექტორი ლარს ურმანი, გერმანიის საელჩოს, განვითარების სფეროში თანამშრომლობის განყოფილების ხელმძღვანელი კატერინა დერკონი დაესწრნენ.
საქართველოს მხრიდან კი შეხვედრაზე იმყოფებოდნენ ეკონომიკისა და მდგრადი განვითარების მინისტრი, ვიცე-პრემიერი გიორგი კვირიკაშვილი, საპარლამენტო უმრავლესობის ლიდერი დავით საგანელიძე, საქართველოს პრემიერ-მინისტრის თანაშემწე ეკონომიკურ საკითხებში - ეკონომიკური საბჭოს მდივანი რომან ჩხენკელი და ეკონომიკური საბჭოს მდივნის მოადგილე გიორგი ყაველაშვილი.
--
მასალის გამოყენების პირობები
