დარიალის ხეობაში მიმდინარე სამუშაოები დღეს სომხეთის ტრანსპორტისა და კომუნიკაციების მინისტრმა დაათვალიერა. გაგიკ ბეგლარიანს მასპინძლობას ეკონომიკისა და მდგრადი განვითარების მინისტრის მოადგილე მიხეილ ჯანელიძე და რეგიონული განვითარებისა და ინფრასტრუქტურის მინისტრი ელგუჯა ხოკრიშვილი უწევდნენ. სამუშაოების დათვალიერების შემდეგ სომხეთიდან ჩამოსულმა დელეგაციამ, რომელშიც ტრანსპორტის მინისტრთან ერთად სომხეთიდან ჩამოსული 20-მდე ჟურნალისტიც შედიოდა, ლარსის საბაჟო-გამშვები პუნქტი მოინახულეს. სომხეთის ტრანსპორტისა და კომუნიკაციების მინისტრის განცხადებით, ძალიან მნიშვნელოვანია, რომ ლარსის საბაჟო-გამშვები პუნქტი გაიხსნა და თითქმის ერთთვიანი შეფერხების შედეგად საავტომობილო მოძრაობა ორივე მიმართულებით აღდგა.
,,ჩვენთვის ძალიან მნიშვნელოვანი იყო ამ გზის გახსნა, რადგან სომხეთს რუსეთთან ეს ერთადერთი დამაკავშირებელი გზა აქვს. ვნახეთ როგორი დატვირთვით მუშაობენ მანქანები, ორივე მხრიდან-როგორც საქართველოს, ისე რუსეთის. ჩამოწოლილი მეწყერის შედეგად სომხეთიდან დაახლოებით 200-მდე მანქანა იყო გაჩერებული. მივესალმებით, რომ ხანგრძლივი და ინტენსიური მუშაობის შედეგად ლარსის საბაჟო-გამშვებ პუნქტზე მუშაობა აღდგენილია,-"განაცხადა გაგიკ ბეგლარიანმა.
ეკონომიკისა და მდგრადი განვითარების მინისტრის მოადგილის, მიხეილ ჯანელიძის ინფორმაციით, სომხეთის ტრანსპორტის მინისტრმა ადგილზე ნახა ის სამუშაოები, რომელიც თითქმის ერთი თვის თვის მანძილზე მიმდინარეობდა. მინისტრის მოადგილის განმარტებით, საავტომობილო მოძრაობა აღგენილია.
,,დღეს გაიხსნა ლარსის საბაჟო-გამშვები პუნქტი. ტრანზიტი სრულად აღდგა,როგორც საქართველოდან მიმავალი ავტომობილებისთვის, ისე რუსეთის მხრიდან შემომავალი ტრანსპორტისთვის. საბაჟოზე ამ ეტაპზე არ დგას რიგები. როგორც მსუბუქი, ისე სატვირთო მანქანები თავისუფლად გადაადგილდებიან,-‘'განაცხადა მიხეილ ჯანელიძემ.
რეგიონული განვითარებისა და ინფრასტრუქტურის მინისტრის შეფასებით, დარიალის ხეობაში მასშტაბური სამუშაოები 24 საათიან რეჟიმში გრძელდება. ძირითადი გზის გასაყვანად უმოკლეს დროში დაიწყება საპროექტო სამუშაოები და დაიწყება კაპიტალური გზის მშენებლობა.
