გადამხდელთა მომსახურების გამარტივების მიზნით, მაღალმთიანი რეგიონის მოსახლეობას უახლოეს მომავალში შემოსავლების სამსახურის მობილური სერვის-ცენტრები მოემსახურება - ფინანსთა სამინისტროს ამ ახალი ინიციატივის შესახებ განცხადება ფინანსთა მინისტრმა, ნოდარ ხადურმა სტეფანწმინდაში სტუმრობისას განაცხადა, სადაც იგი გადამხდელებს შეხვდა.
ფინანსთა მინისტრმა ასევე მოინახულა საბაჟო-გამშვები პუნქტი „ყაზბეგი", რომლის მუშაობაც დარიალის ხეობაში მეწყერის ჩამოწოლის გამო დროებით შეფერხებულია. მინისტრი გაესაუბრა ადგილზე მომუშავე მებაჟეებს და მათგან მოისმინა ინფორმაცია არსებული ვითარების შესახებ. როგორც მინისტრმა აღნიშნა, გზის გახსნისთანავე საბაჟო მზადაა ჩვეული რეჟიმით განაახლოს მუშაობა.
„ადგილობრივ მოსახლეობას გავაცანით ფინანსთა სამინისტროს ინიციატივა, რომელიც ითვალისწინებს მაღალმთიანი რეგიონის მაცხოვრებელთათვის შემოსავლების სამსახურის მობილური სერვის-ცენტრების ამოქმედებას. ვფიქრობთ, გადამხდელებს გაუმარტივდებათ საქმიანობა და ბიუჯეტთან ანგარიშსწორება. რაც შეეხება საბაჟო-გამშვები პუნქტის „ყაზბეგის" მუშაობას, გზის გახსნისთანავე ჩვენ დავიწყებთ მომსახურებას, რაც ჩვენს ექსპორტიორებს გაუადვილებს მიმოსვლას რუსეთის ფედერაციასთან და იმედი გვაქვს, რომ ახალი შესაძლებლობები, რომელიც გაჩნდა მათ შორის სოფლის მეურნეობის პროდუქციის ექსპორტის თვალსაზრისით სრულად იქნება გამოყენებული," - აღნიშნა ფინანსთა მინისტრმა ნოდარ ხადურმა. ფინანსთა და რეგიონული განვითარებისა და ინფრასტრუქტურის მინისტრმა დარიალის ხეობაში გზის გაწმენდითი სამუშაოები დაათვალიერეს.
