13 ივნისს საქართველოს ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა ევროპის საინვესტიციო ბანკის ვიცე-პრეზიდენტი ვილჰელმ მოლტერერი მიიღო. შეხვედრაზე საუბარი წარიმართა ევროპის საინვესტიციო ბანკის მიერ საქართველოში მიმდინარე და დაგეგმილ ინფრასტრუქტურულ პროექტებზე. მათ შორის, წყალმომარაგებისა და ნარჩენების მართვის თაობაზე.
ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა სტუმარს მადლობა გადაუხადა თანამშრომლობისთვის და საქართველოში მიმდინარე ეკონომიკური რეფორმები და ბიზნესის მხარდამჭერი სახელმწიფო პროგრამები გააცნო. მათ შორის, მეწარმეობის მხარდაჭერისა და ფასიანი ქაღალდების ბაზრის განვითარების მიმართულებით.
შეხვედრაზე საუბარი წარიმართა პროგრამის „აწარმოე საქართველოში" შესახებ, რომლის მიზანსაც წარმოადგენს მეწარმეობის განვითარება, მეწარმე-სუბიექტების მხარდაჭერა, ახალი საწარმოების შექმნის ხელშეწყობა, აგრეთვე, კერძო სექტორის კონკურენტუნარიანობისა და საექსპორტო პოტენციალის ზრდა, ფინანსებზე, უძრავ ქონებასა და თანამედროვე ტექნოლოგიებზე ხელმისაწვდომობის გამარტივებისა და საკონსულტაციო მომსახურების გაწევის საშუალებით.
ევროპის საინვესტიციო ბანკის ვიცე-პრეზიდენტმა ვილჰელმ მოლტერერმა დიდი ინტერესი გამოხატა სახელმწიფო პროგრამის „აწარმოე საქართველოში" მიმართ და არ გამორიცხა, ევროპის საინვესტიციო ბანკის მიერ სამომავლოდ საქართველოში მეწარმეობის განვითარების პროგრამის მხარდამჭერი პროექტების განხორციელება.
ევროპის საინვესტიციო ბანკი საქართველოში პროექტებს 2007 წლიდან ახორციელებს. ამ ხნის მანძილზე, ბანკმა 500 მილიონამდე ევროს მოცულობის ინვესტიცია განახორციელა როგორც სახელმწიფო ინფრასტრუქტურულ პროექტებში, ასევე კერძო სექტორის განვითარებისთვის.
