ეკონომიკისა და მდგრადი განვითარების მინისტრის პირველი მოადგილის დიმიტრი ქუმსიშვილის განცხადებით, „საქართველოს პროფესიული კავშირების გაერთიანებამ" სახელმწიფოს გადმოსცა დაბა წყნეთში, გურამიშვილის N 7-ში განთავსებული 3 კორპუსი, მათი მიმდებარე ტერიტორია და თბილისის ზღვაზე მდებარე ე.წ. „კადეტთა კორპუსი", რომელიც 6 შენობას მოიცავს. ორივე ობიექტზე წლების განმავლობაში ცხოვრობენ საქართველოს ოკუპირებული ტერიტორიებიდან იძულებით გადაადგილებული პირები.
ეკონომიკისა და მდგრადი განვითარების სამინისტრო აღნიშნულ ქონებას გადასცემს იძულებით გადაადგილებულ პირთა, განსახლებისა და ლტოლვილთა სამინისტროს შუამდგომლობის საფუძველზე. ორივე ობიექტის საცხოვრებელი ფართი გადანაწილდება 262 ოჯახზე, რომლებიც შესაბამისი პროცედურების შემდეგ აღნიშნულ საცხოვრებელ ფართს საკუთრებაში მიიღებენ.
ახლანდელი ხელისუფლების პირობებში, ეკონომიკისა და მდგრადი განვითარებისა და იძულებით გადაადგილებულ პირთა, განსახლებისა და ლტოლვილთა სამინისტროების ერთობლივი მუშაობის შედეგად მთელი ქვეყნის მასშტაბით იძულებით გადაადგილებულ პირებს გადაეცათ 150-მდე ობიექტი, 2000-მდე ოჯახს უკვე საკუთარი ბინა აქვს. ობიექტების ნაწილში ამ ეტაპზე სარეაბილიტაციო სამუშაოები მიმდინარეობს და უახლოეს მომავალში ისინიც იძულებით გადაადგილებულ პირებს საკუთრებაში გადაეცემათ. მთავრობა ამ მიმართულებით მომავალშიც ინტენსიურად იმუშავებს.
