,,ნაცმოძრაობის" წარმომადგენლის ზურაბ ჭიაბერაშვილის განცხადებით, პრემიერ-მინისტრის ირაკლი ღარიბაშვილის BBC-თვის მიცემული ინტერვიუ აზიანებს, როგორ ქვეყნის ტერიტორიის დეოკუპაციის საკითხს, ასევე საქართველოს იმიჯს.
,,სამწუხაროდ, პუტინისადმი მავნებლურ პოლიტიკას და რიტორიკას რომელმაც საფუძველი ბიძინა ივანიშვილმა ჩაუყარა აგრძელებს ირაკლი ღარიბაშვილი დღევანდელი პრემიერი, რომელსაც არაფერი საერთო არ აქვს საქართველოს ეროვნულ ინტერესებთან.Aამან შედეგად შეიძლება მოგვცეს ის რომ საქართველოს ტერიტორიების დეოკუპაციის საკითხმა ევროპელი და ამერიკელი პარტნიორების დღის წესრიგში სულ უკან ჩაიწიოს, ეს კი ხელს აძლევს რუსეთს. მას ხელ-ფეხს გაუხსნის, რომ როგორც ეს უკვე გააკეთა უკრაინაში ყირიმთან მიმართებაში, იგივე გააკეთოს აფხაზეთთან და ცხინვალის რეგიონთან მიმართებაში", _განაცხადა ჭიაბერაშვილმა.
შეგახსენებთ, რომ დიდ ბრიტანეთსა და ჩრდილოეთ ირლანდიის გაერთიანებულ სამეფოში ვიზიტით მყოფმა პრემიერ-მინსტრმა ირაკლი ღარიბაშვილმა BBC-ს პირდაპირ ეთერში ისაუბრა.
ღარიბაშვილმა BBC-სთან ინტერვიუში ყურადღება გაამახვილა რუსეთ-საქართველოს ურთიერთობებზე, ოკუპირებულ ტერიტორიებსა და საქართველოს ნატო-ში ინტეგრაციის პერსპექტივებზე.როგორც ღარიბაშვილმა განმარტა ახლმა მთავრობამ რუსეთთან ურთიერთობა რადიკალურად შეცვალა და ამ მიზნით კონსტრუქციული ნაბიჯები გადადგა.
პრემიერის განცხადებით, საქართველოს სურს გახდეს ევროკავშირის წევრი და პარალელურად რუსეთთანაც ნორმალური ურთიერთობა ჰქონდეს. როგორც ღარიბაშვილმა განაცხადა რუსეთი არ არის დაინტერესებული აფხაზეთისა და ე.წ. სამხრეთ ოსეთის მიერთებით.
,,აფხაზეთში აბსოლუტურად განსხვავებული სიტუაცია ვიდრე ყირიმში. თუ შევადარებთ აფხაზეთში, ე.წ სამხრეთ ოსეთში და ყირიმში არსებულ ვითარებას ძალიან დიდი შეცდომა მოგვივა. Aამ ორ დეფაქტო, ე.წ სახელმწიფოებს სურვილი ჰქონდათ დამოუკიდებლობა მოეპოვებინათ და რუსეთმა აღიარა ორი დეფაქტო წარმონაქმნის დამოუკიდებლობა. Mმას შემდეგ პროგრესს ადგილი არ ჰქონია, რადგან ეს ორი ტერიტორია გახლავთ საქართველოს ნაწილი და ჩემი თვალსაზრისით რუსეთი დაინტერესებული არ არის ამ ორი ტერიტორიის მიერთებით", _განაცხადა ღარიბაშვილმა.