განსაკუთრებული საჭიროების მქონე 23 წლის, რამინ მაჭარაშვილი ხვალ, ერთი დღით აჭარის ავტონომიური რესპუბლიკის ჯანმრთელობისა და სოციალური დაცვის მინისტრის სავარძელს მოირგებს.
შოთა რუსთაველის სახელმწიფო უნივერსიტეტის სამართალმცოდნეობის სპეციალობის მე-4 კურსის სტუდენტი სამუშაო დღეს მინისტრ ნუგზარ სურმანიძესთან ერთად გაატარებს.
რამინ მაჭარაშვილი მონაწილეობას მიიღებს ყველა იმ ღონისძიებაში, რაც გათვალისწინებულია მინისტრის დღის წესრიგით.
სამუშაო დღე მოქალაქეების განცხადებების განხილვით დაიწყება, დაგეგმილია მოქალაქეთა მიღებაც. მოგვიანებით გაიმართება თათბირი, რომელსაც დაესწრებიან მინისტრის მოადგილეები და სამინისტროს დეპარტამენტების უფროსები, შეხვედრაზე უწყების სამომავლო გეგმები და პროექტები განიხილება.
თათბირის დასრულების შემდეგ რამინ მაჭარაშვილი და ნუგზარ სურმანიძე ბათუმის საწრაფო სამედიცინო დახმარების ცენტრს ეწვევიან და ტურისტული სეზონის დადგომასთან დაკავშირებით ცენტრის მზადყოფნას გაეცნობიან. შეხვედრაზე განიხილება სასწრაფო სამედიცინო დახმარების ბრიგადების სანაპირო ზოლში მორიგეობის საკითხი.
დღის ბოლოს მინისტრი და განსაკუთრებული საჭიროების მქონე პირი, შშმ პირთა სარეაბილიტაციო ცენტრს მოინახულებენ. ცენტრში სხვა შშმ პირებთან ერთად რეაბილიტაციის 25 დღიან კურსს მაღალმთიანი აჭარის 10-მდე შშმ ბავშვი გადის. „შეზღუდული შესაძლებლობის სტატუსის მქონე ბავშვთა სოციალური ადაპტაციის" პროგრამას სამინისტრო წელს პირელად ახორციელებს. პროგრმის ფარგლებში 25 დღიან რეაბილიტაციის კურსს მაღალმთიანი აჭარის 50-მდე შშმ ბავშვი წლის ბოლომდე 2-ჯერ გაივლის.
პროექტი, რომლიც შშმ პირების სახელმწიფო სტრუქტურების ხელმძღვანელებთან ერთი სამუშაო დღის გატარებას ითვალისწინებს, არასამთავრობო ორგანიზაცია „ახალგაზრდა მოქალაქის" ინიციატივით ხორციელდება.
