ქვეყანაში კიდევ ერთი ტურისტული ობიექტის მშენებლობა იგეგმება, რომლის ინვესტორიც კომპანია „კახური ტრადიციული მეღვინეობა" იქნება. როგორც საქართველოს მთავრობის №87 8 განკარგულებაშია აღნიშნული, „კახური ტრადიციული მეღვინეობა" დუშეთში, მცხეთა-სტეფანწმინდა-ლარსის საავტომობილო გზის მე-19 კ.მ-ზე 1929.00 კვ.მ ფართობის არასასოფლო-სამეურნეო დანიშნულების მიწის ნაკვეთია და მასზე დამაგრებული შენობა-ნაგებობის მფლობელი გახდა. მთავრობის გადაწყვეტილებით „კახური ტრადიციული მეღვინეობა" აღნიშნულ ქონებას, პირდაპირი მიყიდვის ფორმით, 6 500 ლარად დაეპატრონა.
კომპანიას საინვესტიციო ვალდებულებად განესაზღვრა, რომ ის შესაბამისი ხელშეკრულების გაფორმებიდან 18 თვის ვადაში აღნიშნულ ტერიტორიაზე ტურისტული მომსახურების კომპლექსს ააშენებს, რისთვისაც მინიმუმ 1 მლნ ლარის ინვესტიციას განახორციელებს. კომპანია ასევე ვალდებულია, რომ ობიექტის ექსპლუატაციაში მიღებიდან არა უმეტეს 30 დღისა, მან არანაკლებ 30 კვ.მ ფართობის, უფლებრივად უნაკლო ქონება სახელმწიფოს საკუთრებაში უსასყიდლოდ გადასცეს.
მთავრობის განკარგულებაში ასევე აღნიშნულია, რომ „კახური ტრადიციული მეღვინეობა"
ვალდებულია ტურისტული მომსახურების კომპლექსის ფუნქციონირების დაწყებიდან არა უმეტეს 30 დღის ვადაში ადგილობრივი მოსახლეობისათვის სავაჭრო ფართ(ებ)ი გამოყოს, რომლის სარგებლობის უფლებაც მათ 5 წლის ვადით მიეცემათ, მათ შორის, აღნიშნული ფართ(ებ)ის სარგებლობის უფლებით გადაცემიდან პირველი 1 წლის განმავლობაში - უსასყიდლოდ.
