საგარეო საქმეთა სამინიტრო აშშ-ის ელჩის რიჩარდ ნორლანდისა და საგარეო საქმეთა მინისტრს მაია ფანჯიკიძეს შორის გამართულ შეხვედრას ეხმიანება. როგორც ,,ჯი-ეიჩ-ენთან" საუბარში საგარეო უწყების პრესსამსახურის უფროსმა მარი ნარჩემაშვილმა განაცხადა ეს იყო მხარეებს შორის მორიგი სამუშაო შეხვედრა, სადაც ორ ქვეყანას შორის ურთიერთანამშრომლობის საკითხები განიხილეს და შეხვედრაზე საუბარი არ ყოფილა აშშ-ის საელჩოს მიერ გავრცელებულ განცხადებაზე.
,, ეს იყო უბრალოდ, მორიგი სამუშაო შეხვედრა საგარეო საქმეთა მინისტრსა და ელჩ რიჩარდ ნორლანდს შორის, სადაც ორმხრივი ურთიერთანამშრომლობის გაღრმავების საკითხები განიხილეს. შეხვედრაზე საუბარი არ ყოფილა აშშ-ის საელჩოს მიერ გავრცელებულ განცხადებაზე", _განაცხადა ,,ჯი-ეიჩ-ენთან" საუბარში ნარჩემაშვილმა.
შეგახსენებთ, რომ რამდენიმე საათის წინ საქართველოში აშშ-ის ელჩი რიჩარდ ნორლანდი, საგარეო საქმეთა სამინისტროში იმყოფებოდა, სადაც უწყების ხელმძღვანელს მაია ფანჯიკიძეს შეხვდა.
მხარეებს შორის შეხვედრა, დაახლოებით, 30 წუთი გაგრძელდა.
რიჩარდ ნორლანდმა უწყება უკომენტაროდ დატოვა.
გუშინ კი საქართველოში აშშ-ის საელჩომ ადგილობრივი თვითმმართველობების მოახლოებულ არჩევნებთან დაკავშირებით განცხადება გაავრცელა და ხელისუფლებას მოუწოდა საარჩევნო კამპანიასთან დაკავშირებული ინციდენტები დროულად გამოიძიოს. ,,ჯი-ეიჩ-ენი" გავრცელებულ განცხადებას უცვლელად გთავაზობთ: ,,სულ უფრო მეტი შეშფოთებით ვადევნებთ თვალს ცნობებს 15 ივნისის მუნიციპალური არჩევნების წინ, საარჩევნო კამპანიასთან დაკავშირებული ინციდენტების, არჩევნებიდან ჩამოშორების მიზნით მთავრობის მიერ კანდიდატებზე განხორციელებული სავარაუდო ზეწოლისა და კონკრეტულ ადგილებში, საარჩევნო კომისიების თანამშრომლებზე მიტანილი აგრესიის შესახებ. მოვუწოდებთ ხელისუფლებას, ობიექტურად გამოიძიოს აღნიშნული ბრალდებები და გადადგას ნაბიჯები, როგორც ტექნიკური, ისე პოლიტიკური თვალსაზრისით, რათა უზრუნველყოს ამ არჩევნებში საერთაშორისოდ აღიარებული იმ მაღალი სტანდარტების დაცვა, რომლითაც ბოლო ორი არჩევნები გამოირჩა. მთავრობისათვის, თითოეული პარტიისა და საარჩევნო ოლქისათვის მნიშვნელოვანია, შეიტანოს საკუთარი წვლილი ამ რეგიონში დემოკრატიის უმაღლესი სტანდარტების დამკვიდრებაში", _ნათქვამია განცხადებაში.
