6 ივნისს ფინანსთა სამინისტროს აკადემიაში საერთაშორისო სავალუტო ფონდის (IMF) ინსტიტუტის სასწავლო კურსის ოფიციალური დახურვის ცერემონია გაიმართა, რომელსაც დაესწრნენ ფინანსთა მინისტრის მოადგილე დავით ლეჟავა, ეროვნული ბანკის ვიცე-პრეზიდენტი არჩილ მესტვირიშვილი, სსფ-ის მუდმივი წარმომადგენელი საქართველოში აზიმ სადიკოვი, ფინანსთა სამინისტროს აკადემიის დირექტორი თამარ ჯაფარიძე და დირექტორის მოადგილე გიორგი რაზმაძე.
აკადემიაში სასწავლო კურსი „ფინანსური პროგრამირება და პოლიტიკა", 26 მაისიდან 6 ივნისის ჩათვლით გაგრძელდა და მას საერთაშორისო სავალუტო ფონდის ინსტიტუტის წამყვანი ექსპერტები, კერძოდ, ხარის კრისტოფიდესი, დიმიტრი პლოტნიკოვი და სერილ მაქნაილი უძღვებოდნენ. მსმენელებს საშუალება ჰქონდათ გაცნობოდნენ საერთაშორისო გამოცდილებას, მონაწილე ქვეყნების მაგალითებს. მოხდა არსებული პრობლემების განხილვა და ანალიზი.
სემინარში მონაწილეობდნენ: აზერბაიჯანის, თურქეთის, ტაჯიკეთის, ყირგიზეთის, თურქმენეთის, უზბეკეთის ფინანსთა სამინისტროს წარმომადგენლები, ასევე, საქართველოს ფინანსთა, ეკონომიკისა და მდგრადი განვითარების სამინისტროების, ეროვნული ბანკისა და სტატისტიკის ეროვნული სამსახურის თანამშრომლები. მონაწილეები დაგეგმილი პროგრამის ფარგლებში ასევე გაეცნენ საქართველოში განხორციელებულ რეფორმებს.
პროგრამა საქართველოს ფინანსთა სამინისტროსა და საერთაშორისო სავალუტო ფონდის (IMF) ინსტიტუტის ეგიდით ტარდება და საქართველო უკვე მეოთხედ მასპინძლობს.
IMF-ის ინსტიტუტის სასწავლო კურსის ჩატარება ხელს უწყობს საქართველოს აქტიურ ჩართულობას სავალუტო ფონდის საერთაშორისო საგანმანათლებლო პროგრამებში და ეხმარება ქვეყანას ჩამოყალიბდეს როგორც რეგიონის საგანმანათლებლო ცენტრი, სადაც ხდება მაღალი დონის პროფესიული გადამზადება, კვალიფიკაციის ამაღლება და ქართული რეფორების გაზიარება.
საერთაშორისო სავალუტო ფონდის ინსტიტუტი დაარსდა 1964 წელს. მისი მიზანია, ხელი შეუწყოს IMF-ის წევრ ქვეყნებში საჯარო მოხელეების ცოდნის ამაღლებას ეკონომიკურ და ფინანსურ სფეროში. ამ მიზნით, ინსტიტუტი სხვადასხვა ტიპის სემინარებს ატარებს სათაო და შვიდ რეგიონალურ ცენტრში, ასევე მჭიდროდ თანამშრომლობს სხვა რეგიონალურ ინსტიტუტებთან და წევრი ქვეყნების მთავრობებთან.