„ადამიანი, კანონი, თავისუფლებას" აღმასრულებელმა დირექტორმა, ნიკოლოზ მაღალდაძემ რეპორტიორის პრესკლუბში პაატა ქარდავას მკვლელობის საქმესთან დაკავშირებით პრესკონფერენცია გამართა.
ნიკოლოზ მაღალდაძის განცხადებით, „ორგანიზაცია ითვალისწინებს რა უდანაშაულობის პრეზუმციას, ვერ მოახდენს აღნიშნულ საკითხში კონკრეტული პირის დადანაშაულებას, თუმცა მიგვაჩნია, რომ შესაძლოა თენგიზ გუნავა უშუალოდ არ იღებდა მონაწილეობას ე.წ. სპეცოპერაციაში, მაგრამ გამორიცხულია მას არ ჰქონოდა ინფორმაცია მომხდართან დაკავშირებით. შესაძლოა ვივარაუდოთ, რომ თენგიზ გუნავასთვის ცნობილი უნდა ყოფილიყო პაატა ქარდავას მკვლელობის დაგეგმვის ან მომხდარი ფაქტის შესახებ მაინც, რადგან მის დაქვემდებარებაში მყოფ საგამოძიებო სამსახურს პიროვნების გაუჩინარების და ძიების დაწყების შესახებ უნდა ეცნობებინათ შინაგან საქმეთა სამინისტროსთვის, შესაბამისად სპეცოპერაციის დეტალები გუნავასთვის ამის შემდეგ მაინც უნდა გამხდარიყო ცნობილი".
„იმ გარემოების გათვალისწინებით, რომ გამოძიების ინფორმაციით აღნიშნული მკვლელობის შემსრულებლები წარმოადგენდნენ იმდროინდელ შინაგან საქმეთა სამინისტროს განსაკუთრებულ დავალებათა დეპარტამენტის თანამშრომლებს, ხოლო აღნიშნულ მკვლელობაში ბრალდებულია ამავე სამინისტროს კონსტიტუციური უსაფრთხოების დეპარტამენტის აფხაზეთის მთავარი სამართველოს ყოფილი უფროსი რომან შამათავა, ჩნდება საფუძვლიანი ეჭვი იმისა, რომ ინფორმაციას მკვლელობის შესახებ ფლობდა იმდროინდელი სამეგრელო ზემო-სვანეთის სამხარეო პოლიციის უფროსი თენგიზ გუნავაც" - აღნიშნავს ნიკოლოზ მაღალდაძე
მიგვაჩნია, რომ სამართლიანობის აღდგენის მიზნით და საზოგადოების მაღალი ინტერესის გათვალისწინებით, მიუხედავად წინასაარჩევნო პერიოდისა და პრემიერ- მინისტრის მიერ გამოცხადებული მორატორიუმისა, დაუყოვნებლივ უნდა იქნეს გამოძიებული პაატა ქარდავას მკვლელობის საქმე და უმკაცრესად უნდა იქნეს დასჯილი მკვლელობის ყველა შემკვეთი და მონაწილე პირი.
ხელისუფლებამ უპირველესად უნდა იმოქმედოს კანონის უზენაესობიდან გამომდინარე და არა წინასაარჩევნო თუ სხვა მიზეზების გათვალისწინებით. მივმართავთ საგამოძიებო და ძალოვან სამსახურებს, იმოქმედონ კანონის შესაბამისად და მიმართონ ყველა კანონიერ ძალას, რათა საბოლოოდ აღდგეს სამართლიანობა.
