ევროპის ადვოკატთა ასოციაციის პრეზიდენტი საქართველოს ხელისუფლებისაგან ადვოკატების გოგა ონიანისა და ირაკლი ზაქარეიშვილისთვის საადვოკატო საქმიანობისთვის ხელისშემშლელი ფაქტების შესწავლას ითხოვს.
როგორც საქართველოს ადვოკატთა ასოციაციის პრეზიდენტმა ზაზა ხატიაშვილმა დღევანდელ პრესკონფერენციაზე განაცხადა, გოგა ონიანისა და ირაკლი ზააქარეიშვილის ხელისშემშლელ ფაქტებზე საქართველოს ადვოკატთა ასოციაციამ ევროპის ადვოკატთა ასოციაციას მიმართა და აღნიშნულთან დაკავშირებით გადაუგზავნა მტკიცებულებები.
ზაზა ხატიაშვილის თქმით, ადვოკატთა საქმეები ადვოკატთა ასოციაციის აღმასრულებელმა საბჭომ განიხილა, შემდეგ კი ასოციაციის პრეზიდენტმა ალდო ბალგარელიმ საქართველოს პრეზიდენტს, პრემიერსა და პარლამენტის თავმჯდომარეს წერილობით მიმართა.
"აღნიშნულ წერილში ბალგარელი მოითხოვს ადვოკატთა მიმართ შეწყდეს არასამართლებრივი ქმედებები, მოხდეს ადვოკატების საქმიანობის უფლების შეზღუდვის ფაქტების შესწავლა და მიიღონ ზომები დამნაშავე პირების მიმართ, რათა ისინი საბრალდებო სკამზე აღმოჩნდნენ", -თქვა მან.
ზაზა ხატიაშვილმა პრესკონფერენციაზე ევროპის ადვოკატთა ასოციაციის პრეზიდენტის ალდო ბალგარელის საქართველოს პრეზიდენტისადმი, პრემიერისადმი და პარლამენტის თავმჯდომარისადმი გაგზავნილი წერილები წარმოადგინა, სადაც ალდო ბალგარელი ევროპის ადვოკატთა ასოციაციის სახელით მიმართავს საქართველოს ხელისუფლებას, ზემოთ ჩამოთვლილ პირებს, გაატარონ აუცილებელი ღონისძიებები მომავალში ადვოკატთა მიმართ ძალადობის თავიდან ასაცილებლად და უზრუნველყონ, რომ ქართველმა ადვოკატებმა შეძლონ თავიანთი პროფესიული ფუნქციის შესრულება, დაშინების, დაბრკოლების, ღირსების შელახვისა და არასათანადო ჩარევის გარეშე.
ზაზა ხატიაშვილი მიიჩნევს, რომ საქართველოს ისტორიაში პირველად მოხდა, რომ ევროპის ადვოკატთა ასოციაციის პრეზიდენტმა ორჯერ მიწერა წერილი ადვოკატ გოგა ონიანთან დაკავშირებით საქართველოს ხელისუფლებას.