ქვეყანაში მზარდი ტვირთბრუნვის პირობებში ბიზნესისათვის მიმზიდველი გარემოს ფორმირება, მნიშვნელოვნადაა დამოკიდებული ბიზნესის ადმინისტრირების კუთხით, ხარისხიან და ეფექტურ მომსახურებაზე როგორც საბაჟო პროცედურების, ასევე იმპორტ-ექსპორტის ოპერაციების წარმოებისას. ამ მიზნით, დღეს თბილისში ახალი გეზი - გაფორმების ეკონომიკური ზონა „თბილისი 2" გაიხსნა.
გეზი „თბილისი 2" გახსნის პირველივე დღეს საქართველოს პრემიერ-მინისტრმა, ირაკლი ღარიბაშვილმა, ფინანსთა მინისტრმა, ნოდარ ხადურმა და შემოსავლების სამსახურის უფროსმა, ირაკლი გვარამაძემ მოინახულეს.
სამშენებლო სამუშაოები 2013 წლის 5 ნოემბერს დაიწყო და პროექტის ჯამურმა ღირებულებამ 4,5 მლნ. ლარი შეადგინა. აღნიშნული ობიექტის მშენებლობაზე 120 პირი იყო დასაქმებული.
გეზი „თბილისი 2" თანამედროვე სტილის შენობა-ნაგებობაა, რომელიც კომბინირებული მეთოდით - ლითონისა და რკინაბეტონის ელემენტებითაა აგებული. გამოყენებულია ასევე ცეცხლმედეგი მასალებიც.
ახალი გეზი აღჭურვილია თანამედროვე ინფრასტრუქტურითა და ელექტრონული საშუალებებით, სატვირთო ავტომანქანების 4 მისადგომითა და ტვირთის საბაჟო დამუშავებისთვის განკუთვნილი რამპით. რამპის პლატფორმის ფართობი 1157 კვ.მ, ხოლო სასაწყობე ფართი 350 კვ.მ. შეადგენს. გააჩნია სპეციალურად დაგეგმარებული ავტოსადგომი და შესაბამისად, ყველა პირობაა შექმნილი იმისათვის, რომ მეწარმემ კომფორტულ გარემოსა და უმოკლეს დროში, შეძლოს საბაჟო გაფორმებისათვის საჭირო ისეთი პროცედურების განხორციელება როგორიცაა: საბაჟო დეკლარაციის შევსება, ტვირთის გაფორმება, დათვალიერება, წარმოშობის ქვეყნის განსაზღვრა, ლაბორატორიული კვლევა, ფიტოსანიტარიული, ვეტერინარული თუ პროდუქციის სხვა სერტიფიცირება, ექსპერტიზის ჩატარება.
გაფორმების ეკონომიკურ ზონაში „თბილისი 2" საქართველოს ფინანსთა სამინისტროს სსიპ შემოსავლების სამსახურის საბაჟო დეპარტამენტის 40-მდე სპეციალურად მომზადებული, მაღალკვალიფიციური თანამშრომელი დასაქმდა.
სრულყოფილი დატვირთვის შემთხვევაში, გეზი „თბილისი 2" დღის განმავლობაში 200-მდე მეწარმეს მოემსახურება, რაც მნიშვნელოვნად შეამცირებს გეზი „თბილისის" დატვირთვას.
