საქართველო გახდება ნატო-ს წევრი , როგორც კი წევრობისთვის საჭირო კრიტერიუმები შესრულდება, - ამის შესახებ ნატო-ს გენერალურმა მდივანმა ანდერს ფოგ რასმუსენმა ბრიუსელში, საქართველო-ნატო-ს კომისიის სხდომის გახსნისას განაცხადა.
მისი თქმით, ნატო გააგრძელებს საქართველოსთან აქტიურ დიალოგს და საქართველოს შემდგომი რეფორმების გატარების მხარდაჭერას.
როგორც რასმუსენმა განაცხადა, ნატო-ს წევრი ქვეყნები არ აღიარებენ და არც მომავალში აღიარებენ რუსეთის მიერ საქართველოს ტერიტორიების - სამხრეთ ოსეთისა და აფხაზეთის დამოუკიდებლად ცნობას ისევე, როგორც ყირიმის ანექსიას.
„ ნატო იცავს თითოეული ქვეყნის უფლებას, ჰქონდეს სუვერენული არჩევანი საგარეო და უსაფრთხოების პოლიტიკის თვალსაზრისით. დღეს ჩვენ ვაგრძელებთ აქტიურ დიალოგს საქართველოსთან, რომელთანაც მივაღწიეთ კარგ პროგრესს, განსაკუთრებით თავდაცვისა და უსაფრთხოების სექტორის მეტი გამჭვირვალობითა და პასუხისმგებლობით. ჩვენ ასევე ინტერესით ველით რეფორმების შემდგომ განხორციელებას და გავაგრძელებთ საქართველოს მხარდაჭერას ამ პროცესში", - განაცხადა ანდერს ფოგ რასმუსენმა.
მასალის გამოყენების პირობები