პოლიტიკური გაერთიანება "ევროპელი დემოკრატების" ლიდერი პაატა დავითაია აბსურდულს და სასაცილოს უწოდებს ქართული მედიით გავრცელებულ ინფორმაციას, რომლის თანახმადაც მისი თვიური ხელფასი 42 000 ლარს შეადგენს.
დავითაია ამ ფაქტთან დაკავშირებით, საგანგებო განცხადებას აკეთებს.
„ერთ-ერთი მედიასაშუალებით გავრცელდა ინფორმაცია, რომ პარტიის თავმჯდომარის თანამდებობაზე ჩემი ყოველთვიური ხელფასი არის 42 000 ლარი, რაც აბსურდია და სასაცილოა.
ჩვენი პოლიტიკური გაერთიანების წლიური საბიუჯეტო დაფინანსება შეადგენს 200 000 ლარს და ამიტომ 42 000 ლარს ვერ დავინიშნავ თვეში და ოთხი თვის განმავლობაში პარტიის მთელს დაფინანსებას ვერ ავიღებ",_ აცხადებს დავითაია და აღნიშნავს, რომ გავრცელებული ინფორმაცია აბსურდულია.
„ეს სრული აბსურდია, მეტი წარმოდგენისათვის საუბარია აშშ-ს პრეზიდენტზე უფრო მაღალ ხელფასზე.
პარტიის დაფინანსება თვეში გამოდის დაახლოებით 23-25 000 ლარი და ამიტომ ფიზიკურად ვერ გავცემ თვეში 42 000 ლარს",_ აცხადებს დავითაია და აღნიშნავს, რომ მისი ხელფასი 3 000 ლარს შეადგენს.
„ჩემი ხელფასი თვეში არის დაახლოებით 3 000 ლარამდე. უკვე ექვსი წელია რაც პარტია ფინანსდება. ხოლო როდესაც მე პარლამენტის წევრი ვიყავი პარტიიდან ხელფასი ერთხელაც არ ამიღია. მხოლოდ ორი წელია რაც პარლამენტის წევრი აღარ ვარ და პარტიიდან ხელფასს ვიღებ, რომლის რაოდენობაც, როგორც ზემოთ აღვნიშნე თვეში 3 000 ლარია. ამიტომაც გავრცელებული ინფორმაცია არის სასაცილო.
ხაზგასმით აღვნიშნავ, რომ ნებისმიერი თანხა, რომელიც ფინანსდება ბიუჯეტიდან ყველაფერი არის აუდიტის სამსახურის მეთვალყურეობის ქვეშ და ეს ინფორმაცია ღიაა, საჯაროა, ყველასათვის მისაწვდომია და ადვილად გადასამოწმებელი",_ აცხადებს პოლიტიკური გაერთიანება "ევროპელი დემოკრატების" ლიდერი პაატა დავითაია.
