როგორც საქართველოს საგარეო საქმეთა სამინისტროს ოფიციალურ განცხადებაშია ნათქვამი, "რუსეთის ფედერაციას არ გააჩნია რაიმე კომპეტენცია გაეროს ფარგლებში არსებული სამოქალაქო ავიაციის საერთაშორისო ორგანიზაციის (ICAO) ნაცვლად, მიიღოს გადაწყვეტილება რომელიმე აეროპორტისათვის ოთხნიშნა ალფაბეტურ-ციფრული კოდის მინიჭების თაობაზე".

"აღნიშნული სახის გადაწყვეტილება განეკუთვნება მხოლოდ ICAO-ს ექსკლუზიურ კომპეტენციას და ასეთი კოდები ქვეყნდება ICAO -ს დოკუმენტში "7910: ლოკაციის ინდიკატორები". შესაბამისად, ოკუპირებული აფხაზეთის ტერიტორიაზე არსებული მარიონეტული რეჟიმის ე.წ. პრემიერ-მინისტრის სერგეი შამბას განცხადება არის მორიგი მცდელობა შეცდომაში შეიყვანოს ოკუპირებულ ტერიტორიაზე მცხოვრები მოსახლეობა", - ნათქვამია გრიგოლ ვაშაძის უწყების განცხადებაში.

შეგახსენებთ, რომ შამბას გუშინდელი განცხადებით, "სოხუმის აეროპორტმა საერთაშორისო კოდი მიიღო, რომელიც რუსეთმა გამოყო".