საქართველოში ზაფხულის ტურისტული სეზონი ოფიციალურად გაიხსნა. სეზონის გახსნასთან დაკავშირებით, ტურიზმის ეროვნული ადმინისტრაციის ინიციატივით საქართველოს რამდენიმე ქალაქში ქუთაისში, ბორჯომსა და რაჭაში (შაორის წყალსაცავი) სხვადასხვა ტიპის გასართობი ღონისძიებები გაიმართა.
ზაფხულის ტურისტული სეზონი ბათუმში "საოცრებათა პარკში" გახსნა. საოცრებათა პარკის მიმდებარე სანაპიროზე მოეწყო ფრენბურთის მოედანი, მაგიდის ჩოგბურთი, ტანმოვარჯიშეების მოედანი, ქუჩის კალათბურთისა და ხელბურთის სივრცეები. სანაპიროზე გაიშალა შეზლონგები, ზღვაში კი მოეწყო ბილიკები მოცურავეთათვის და წყალბურთის მოედანი. ზღვისპირა პერიმეტრზე განთავსდა სხვადასხვა საზღვაო აღჭურვილობა: სკუტერები, ნავები, კაიაკი, იახტა.
აღსანიშნავია, რომ ბათუმში გასართობი სპორტული ღონისძიებები მუსიკალური გაფორმების თანხლებით მიმდინარეობს. ასევე ბათუმში საღამოს 21 საათზე გაიმართება უფასო კონცერტი დათო ხუჯაძისა და გუფი ლენდის მონაწილეობით, ხოლო 23 საათზე ზაფხულის ტურისტული სეზონის გახსნა შადრევანთან ფეიერვერკით დასრულდება.
რაც შეეხება ქუთაისს, ტურიზმის ეროვნული ადმინსიტრაციის ხელშეწყობით მთავარი ღონისძიებები სამეფო უბნის პარკში იმართება. ტერიტორია სპეციალურად ამ დღისთვის შესაბამისი დეკორაციით და მუსიკით გაფორმდა. საფხულის ტურისტული სეზონის აღსანიშნავად პარკში იმართება სხვადასხვა სახის წარმოდგენები, იმართება ყვავილების ფესტივალი, ასევე ფოლკლორული მუსიკისა და ჯაზის კონცერტი.
რაც შეეხება ბორჯომს მთავარ ღონისძიებებს ბორჯომის პარკი მასპინძლობს, სადაც კოსტიუმირებული წარმოდგენა იმართება. ასევე ეწყობა „ბოდი-არტი". პარკში 20:00 საათამდე გამოფენილი იქნება ძველი საარქივო სურათები. ბაღში განთავსებული კამერული ორკესტრი კი ღონისძიებაში მონაწილეებს განწყობაზე ზრუნავს.
ბორჯომში კი ტურისტული სეზონის დაწყება შაორის ტბაზე ჯომარდში შეჯიბრით აღნიშნეს. ასევე გაიმართა შეჯიბრი კაიაკინგში. დღის ბოლოს კი სხვადასხვა შეჯიბრებებში გამარჯვებულებს სპეციალური პრიზები და სერტიფიკატები გადაეცემათ. 20:00 საათზე ღია ცის ქვეშ საბანაკე სივრცის ტერიტორიაზე დაგეგმილია კინოჩვენება. ტერიტორიაზე დაინთება კოცონი და ყველა მსურველს ექნება საშუალება საღამო მყუდრო და სასიამოვნო გარემოში გაატაროს.
