საპატრიარქოს "ორმოცდაათიანელთა" რელიგიური ღონისძიების შესახებ განცხადებას ავრცელებს.
განცხადების თანახმად, ღირსი ფრანკლინ გრიმის საქართველოში ჩამოყვანასთან და სპორტის სასახლეში დაგეგმილ ღონისძიებასთან საქართველოს საპატრიარქოს კავშირი არ აქვს.
"მასმედიის და ბილბორდების საშუალებით ვრცელდება ინფორმაცია, თბილისში, სპორტის სასახლეში 6-7-8 ივნისს დაგეგმილი ღონისძიების შესახებ, რომელსაც "ორმოცდაათიანელთა" რელიგიური ორგანიზაცია ატარებს და ჩამოყავთ "ორმოცდაათიანელთა" რელიგიური მიმდინარეობის ცნობილი მქადაგებლის, ბილი გრემის შვილი, ფრანკლინი.
ამ ფაქტთან დაკავშირებით ასევე ვრცელდება არასწორი აზრი, თითქოს აღნიშნული ფესტივალის ერთ-ერთი ინიციატორი არის საქართველოს საპატრიარქო, რაც მრევლში სერიოზულ გაურკვევლობას იწვევს.
როგორც აღვნიშნეთ, ღირსი ფრანკლინ გრიმის ჩამოსვლა არის "ორმოცდაათიანელთა" რელიგიური მიმდინარეობის მიერ მოწყობილი და ამ ღონისძიებასთან საქართველოს საპატრიარქოს კავშირი არ აქვს", - ნათქვამია განცხადებაში.
