იუსტიციის მინისტრის თეა წულუკიანის განცხადებით, პოლიტიკური პარტიების კანდიდატებზე ზეწოლის დადგენის შემთხვევაში, რეაგირება იქნება მკაცრი.
აღნიშნულთან დაკავშირებით მინისტრმა ბათუმის იუსტიციის სახლში ჟურნალისტებს განუცხადა, რომ პროკურატურა ფაქტების დადგენას აწარმოებს.
მისივე განცხადებით, პოლიტიკური პარტიების კანდიდატებზე ზეწოლის შესახებ არსებული ფაქტები ამჟამად დადგენის პროცესშია, თუმცა ამ საკითხზე უწყებათაშორის კომისია, გუშინდელი სხდომის მსგავსად, მომავალ შეხვედრზეც იმსჯელებს.
"თითოეული ინფორმაცია, რომელიც ეხება რომელიმე პარტიის რომელიმე კანდიდატზე ზეწოლას, შემოდის უწყებათაშორის კომისიაში. ჩვენ გუშინ ჩავატარეთ გასვლითი სხდომა ხარაგაულში, სადაც ეს ინფორმაციები იქნა განხილული. ინფორმაციები გადაცემულია პროკურატურისთვის, რომელიც აწარმოებს ფაქტების დადგენას. თუ გამოვლინდება, რომ ვინმეზე იყო ზეწოლა, ვინმეს მხრიდან, ვინც არ უნდა იყოს ზეწოლის ავტორი, რეაგირება იქნება მკაცრი. ჯერჯერობით, ფაქტები დადგენის პროცესშია", - აღნიშნა თეა წულუკიანმა.
იუსტიციის მინისტრმა ბათუმში აღსრულების ეროვნული ბიუროს აღსრულების პოლიციის თანამშრომლები დააჯილდოვა.
