პრემიერ-მინისტრმა ირაკლი ღარიბაშვილმა პოლიციელებს პროფესიული დღე მიულოცა და ის პერიოდი გაიხსენა, როცა ის შს მინისტრი იყო.
,,ამ სისტემაში გატარებულმა თითოეულმა დღემ უზარმაზარი გამოცდილება და ცოდნა მომცა, ასევე მომცა განსხვავებული ენერგია. აქ სულ სხვა სულისკვეთებაა. აქ განვიცადე ის ბედნიერება, რასაც ჰქვია შენი სამშობლოს სიყვარული, შენი სამშობლოს სამსახური. სწორედ აქ შეგიძლია ბოლომდე გამოხატო შენი ერთგულება და სამშობლოს სიყვარული. აქ შეგიძლია დაამტკიცო, თუ როგორ ერთგულად ემსახურები შენს ქვეყანას.მე ვარ მადლიერი თითოეული თქვენგანის, იმიტომ, რომ თქვენი წარმატებული საქმიანობა ყოველთვის განაპირობებს მინისტრის წარმატებულ საქმიანობას", - განაცხადა პრემიერ-მინისტრმა.
ღარიბაშვილმა შს მინისტრს ალექსანდრე ჭიკაიძეს გაწეული საქმიანობისთვის მადლობა გადაუხადა და აღნიშნა, რომ მან იცის სამშობლოს სიყვარული და საქმის ერთგულება.
,,ლექსო არის ნამდვილი პოლიციელი. ის არის ღირსეული ადამიანი, რომელიც ღირსეული პოლიციელის ოჯახში აღიზარდა. ის არის ადამიანი, რომელმაც იცის სამშობლოს სიყვარული და საქმის ერთგულება. ეს არის ადამიანი, რომელიც არასოდეს გიღალატებს. მე ვიცი, რომ თქვენ ყველას გაქვთ თქვენი მინისტრის იმედი", - განაცხადა ღარიბაშვილმა.
