საქართველო, უკრაინა და მოლდოვა უნდა გახდნენ ევროკავშირის წევრები. ევროკომისარმა გაფართოებისა და სამეზობლო პოლიტიკის საკითხებში შტეფან ფულემ აღნიშნულთან დაკავშირებით გერმანულ გამოცემა Die Welt-თან ინტერვიუში განაცხადა.
მისი თქმით, ევროკავშირის წევრობის პერსპექტივა აღმოსავლეთ ევროპის ამ ქვეყნებისთვის შესაძლოა, რეფორმების გატარების კუთხით საუკეთესო სტიმულად იქცეს.
"ევროინტეგრაციის პერსპექტივა საუკეთესო სტიმულია აღმოსავლეთ ევროპის ქვეყნებში რეფორმების გატარებისთვის" - აღნიშნავს შტეფან ფულე.
მისივე თქმით, თუ ევროკავშირი სერიოზულად ისწრაფვის აღმოსავლეთ ევროპაში ტრანსფორმაციისკენ, უნდა გამოიყენოს ძლიერი ინსტრუმენტი, რომელიც ხელს შეუწყობს გაფართოებას.
გერმანულ გამოცემასთან საუბრისას ევროკომისრის განცხადებით საქართველოში, უკრაინასა და მოლდოვაში მაღალია ევროპული იდეებისა და ფასეულობების მხარდაჭერა.
მასალის გამოყენების პირობები
