პორტატულ მოსასმენ აპარატურასთან დაკავშირებით მიმდინარე გამოძიების თემაზე მთავარი პროკურორის მიერ საჯარო განცხადების გაკეთება დაგეგმილი არ არის.
როგორც "ჯი-ეიჩ-ენ"-ს მთავარი პროკურატურის პრესსამსახურში განუცხადეს, ამ თემაზე 30 მაისს გიორგი ბადაშვილის ბრიფინგი წინასწარ დაგეგმილი არ ყოფილა და დღევანდელი ღონისძიება, რომელსაც ბადაშვილი მთავარ პროკურატურაში გამართავს, ჟურნალისტებისთვის დახურულია.
გიორგი ბადაშვილმა 27 მაისს , თბილისის პროკურატურაში გამართულ ღონისძიებაზე ჟურნალისტებს განუცხადა, რომ პორტატულ მოსასმენ აპარატურასთან დაკავშირებით მიმდინარე გამოძიებაზე 30 მაისს, პროკურატურის დღესთან დაკავშირებით დაგეგმილ ღონისძიებაზე ისაუბრებდა.
27 მაისს პორტატულ მოსასმენ აპარატურის დაკარგვასთან დაკავშირებით ბადაშვილმა მხოლოდ ის განაცხადა, რომ გამოძიება დაწყებულია და მას მთავარი პროკურატურა აწარმოებს.
ამასთან, რამდენიმე კვირის წინ პროკურატურამ გააკეთა განცხადება, რომ ყოფილი ხელისუფლების მაღალჩინოსნებმა ე.წ.მოდულის შენობიდან მოსასმენი აპარატურა გაიტანეს და ამ საქმეზე გამოძიება მიმდინარეობს.
