თავდაცვის მინისტრი ირაკლი ალასანია აფხაზეთში შექმნილ ვითარებას ეხმიანება და აცხადებს, რომ მთელი პასუხისმგებლობა ოკუპანტ ქვეყანას ეკისრება.
მისივე განმარტებით, ქართულ მხარეს აღელვებს როგორ აისახება აფხაზეთში განვითარებული მოვლენები იქ დარჩენილ ქართულენოვან მოსახლეობაზე.
,, ეს არის კიდევ ერთი დემონსტრირება საოკუპაციო ძალების მხრიდან, იმ ქვეყნის მხრიდან, რომელსაც ჩვენი ტერიტორიების 20% ოკუპირებული აქვს, ის აგრძელებს არა მხოლოდ სამხედრო ანექსიას, არამედ აგრძელებს პოლიტიკურ ანექსიასაც. ჩვენ ძალიან გვაღელვებს, როგორ განვითარდება მოვლენები ოკუპირებულ ტერიტორიაზე. ჩვენ გავაღელებს ეს როგორ აისახება ჯერ კიდევ იქ დარჩენილ აფხაზეთის, გალის ტერიტორიაზე ქართულენოვან მოსახლეობაზე. ჩვენ ვაკვირდებით მოვლენებს და მხოლოდ და მხოლოდ მოლაპარაკებების გზით ვაპირებთ ამ პრობლემების დარეგულირებაზე ზრუნვას. არის ჟენევის ფორმატი, სადაც მომავალში ეს საკითხები იქნება განხილული. მინდა ხაზი გავუსვა, რომ აფხაზეთის ტერიტორიას საოკუპაციო ძალები აკონტროლებენ, საქართველოს ხელისუფლების იურისდიქცია არ ვრცელდება, აქედან გამომდინარე, მთელი პასუხისმგებლობა შექმნილ ვითარებაზე ეკისრება ოკუპანტ ქვეყანას", - განაცხადა ალასანიამ.
