აფხაზური ე.წ. ვეტერანების ორგანიზაციის „არუააა"-ს ლიდერი ვიტალი გაბნია აცხადებს, რომ აფხაზეთის ახლანდელი ე.წ. ხელისუფლების ქმედებებით უკმაყოფილო ხალხისათვის ბოლო წვეთი ე.წ. აფხაზური პასპორტების გაცემა გახდა.
„ბოლო წვეთი იყო ის, რომ მოქალაქეობის დამადასტურებელი მთავარი საბუთის დარიგება აფხაზეთის აღმოსავლეთ რაიონებში მცხოვრები ქართული ეროვნების მოსახლეობისათვის მასობრივად დაიწყო.
ჩვენი საკონსტიტუციო კანონები ამის უფლებას არ იძლეოდა. მოქმედი პრეზიდენტი კი ყველა კანონის დარღვევით ადამიანებს სხვა ტერიტორიიდან აფხაზურ პასპორტებს ურიგებდა",_ აცხადებს ვიტალი გაბნია რუსულ მედიასთან საუბარში და აღნიშნავს, რომ სარგებლობდა რა რუსეთის მხარდაჭერით, ანქვაბი არაფერს არ აკეთებდა ეკონომიკის რეალური სექტორის განვითარებისათვის.
„ახლა ხელისუფლების დამხობა მოხდა. ახლა პარლამენტის სხდომა იწყება, რომელზეც დროებითი მთავრობა ლეგიტიმურად გამოცხადდება და ახალი არჩევნების ვადა დაინიშნება.
დიდი ხნის განმავლობაში ანქვაბთან მიმდინარეობდა მოლაპარაკებები კადრების როტაციის შესახებ. აფხაზეთი ვერ იქნება დამოუკიდებელი რესპუბლიკა მაშინ როდესაც ქვეყნის ბიუჯეტის 70 % რუსეთი ავსებს. ვიდრე ასეთი დახმარება არსებობდა ეკონომიკს განვითარება იყო საჭირო. ამისათვის კი არაფერი არ გაკეთებულა",_ აცხადებს გაბნია.