ექსპერტი უსაფრთხოების საკითხებში ხათუნა ლაგაზიძე ,,ჯი-ეიჩ-ენთან" საუბარში პრემიერსა და პრეზიდენტს შორის არსებულ დაპირისპირებაზე მიუთითებს და აცხადებს, რომ არსებული ვითარება დაასუსტებს სახელმწიფო ინსტიტუტებს და ნეგატიურ გავლენას იქონიებს საქართველოს იმიჯზე.
,,მე არ ვიცი თავად პრეზიდენტი და პრემიერი რას ეძახიან თავიაანთ ურთიერთობას, მაგრამ ის რაც ზედაპირზე ამოდის ნამდვილად არის, სამწუხაროდ, დაპირისპირების გამოძახილი. ეს ყველაფერი პრობლემურია ქვეყნის იმიჯისთვის. ასევე ქვეყნის შიგნით როცა ასეთ დავა, თუ დაპირისპირებაა პრეზიდენტსა და პრემიერს შორის ეს იწვევს საზოგადოებაში სახელმწიფო ინსტიტუტების მიმართ ნდობის დაკარგვას. ზოგადად რატომ დადგა საქართველოში საპრეზიდენტო რესპუბლიკიდან საპარლამენტო რესპუბლიკის მოდელზე გადასვლის საკითხი?-არა მარტო იმიტომ, რომ თავის დროზე სააკაშვილმა მოიწადინა თავის თავზე მოერგო კონსტიტუცია და შემდეგ პრემიერის ინსტიტუტის საშუალებით ემართა ქვეყანა, არამედ რეალურად პრეზიდენტის ინსტიტუტის მიმართ საზოგადოების უნდობლობის მიზეზი სააკაშვილის მმართველობა გახდა, რამაც თავად პრეზიდენტის ინსტიტუტი ეჭქვეშ დააყენა. ის რაც დღეს ხდება პრეზიდენტსა და პრემიერს შორის, ეს პირდაპირი ნიშანია იმის, რომ ხვალ და ზეგ საზოგადოებამ, შეიძლება, პრეზიდენტისა და პრემიერის ინსტიტუტების მიმართ დაკარგოს ნდობა, რაც ზოგადად სახელმწიფო ინსტიტუტებს ასუსტებს", _განაცხადა ,,ჯი-ეიჩ-ენთა" საუბარში ხათუნა ლაგაზიძემ.
მისივე განმარტებით, პრეზიდენტსა და პრემიერს შორის დაპირისპირება ნეგატიურ გავლენას იქონიებს საქართველოს იმიჯზე საერთაშორისო ასპარეზზე.
,,რაც შეეხება ქვეყნის საგარეო იმიჯს. მინდა პარალელი გავავლო იგივე უკრაინასთან. უკრაინის პოლიტიკური სპექტრის მიმართ დასავლეთს უნდობლობა გაუჩნდა არა მხოლოდ იანუკოვიჩის გადაწყვეტილების შემდე, არამედ უფრო ადრე. დასავლეთი მიიჩნევდა, რომ უკრაინის პოლიტიკურ სპექტრს უნარი არ შესწევდა ქვეყანა იმგვარად ემართა რომ კატაკლიზმები თავიდან აეცილებინა, გნებავთ პოლიტიკური, გნებავთ ეკონომიკური მიმართულებით. სწორედ ამიტომ თავის დროზე უკრაინის მხარდაჭერა დასავლეთის მხრიდან არ იყო ისეთი რომელიც უკრაინას და ევროპას შემდგომ კატაკლიზმებს ააცილება. საქართველოში ის რა დღეს ხდება ჩვენმა ხელისუფლებამ ისე რომ შეხედოს როგორც სხვა ქვეყანაში მიმდინარე პროცესს რამდენად სერიოზულად აღიქვამს ის იმ ხელისუფლებას, სადაც პრემიერი და პრეზიდენტი ასეთ დამოკიდებულებაშია ერთმანეთთან? იგივე დამოკიდებულება ექნებათ სხვა სახელმწიფოებს საქართველოს მიმართ, რაც ქვეყნისთვის პერსპექტივაში ცუდი შედეგის მომტანი იქნება", _განაცხადა ლაგაზიძემ ,,ჯი-ეიჩ-ენთან" საუბარში.