28 მაისს, 11 საათზე სასტუმროში „ქორთიართ მერიოტი" სახალხო დამცველი საერთაშორისო ორგანიზაციების, საქართველოში აკრედიტებული დიპლომატიური კორპუსის და არასამთავრობო ორგანიზაციების წარმომადგენლებს საპარლამენტო ანგარიშს წარუდგენს.
ანგარიში მიმოიხილავს 2013 წელს ქვეყანაში ადამიანის უფლებათა და თავისუფლებათა დაცვის მდგომარეობას, ასევე სამოქალაქო-პოლიტიკურ, ეკონომიკურ, სოციალურ და კულტურულ უფლებათა ფართო სპექტრს. დოკუმენტში ყურადღებაა გამახვილებული ადამიანის უფლებათა სფეროში გამოვლენილ დადებით და უარყოფით ტენდენციებზე, ასევე თავმოყრილია სახალხო დამცველის მიერ ხელისუფლების სხვადასხვა შტოების მისამართით შემუშავებული ძირითადი რეკომენდაციები, რომელთა შესრულების დროულობასა და ხარისხზე მნიშვნელოვანწილად იქნება დამოკიდებული ადამიანის უფლებათა დაცვის მაღალი სტანდარტების დამკვიდრება ქვეყანაში.
2013 წელს 11 ათასზე მეტმა პირმა მიმართა სახალხო დამცველის ოფისს, რაც წინა წლებთან შედარებით გაორმაგებული მაჩვენებელია და მეტყველებს ოფისისადმი გაზრდილ მოლოდინებზე, დარღვეული უფლებების შესახებ საზოგადოების ცნობიერების ამაღლებასა და ქვეყანაში თავისუფალი გარემოს არსებობაზე.
საპარლამენტო ანგარიშის შემოკლებული ვერსია, რომელიც შეხვედრის მონაწილეებს დაურიგდებათ, 65 გვერდია. სრული ანაგარიში საქართველოს პარლამენტში მიმდინარე წლის 31 მარტს გაიგზავნა და მისი განხილვა უახლოეს პერიოდში იგეგმება.